Astanalyq metsenat, dizainer Mansýra Jáken biznesmenderdi Táýelsizdik 30 jyldyǵy qarsańynda qaiyrymdy isterge kóbirek atsalysýǵa úndedi, dep habarlaidy QazAqparat.
«Nur-Sultan qalasynda metsenat degen atqa sai turǵyndar kóp ekenine senimdimin. «Rýhani jańǵyrý» baǵdarlamasynyń aiasynda «Qaiyrymdy ister marafony» jáne «30 qaiyrymdy is» atty aktsiialar ótip jatqanyn bilesizder. Men de sol aktsiialarǵa qatysyp júrmin. Syilyqtyń eń jaqsysy óz qolyńmen istegen» degendei, Qýanyshbaev atyndaǵy qazaq drama teatryna óz qolymnan shyqqan keskindemelik pano syilaǵan bolatynmyn. Bul mozaikada qazaq jigitteriniń ór rýhy áspettelgen. Naryqtaǵy quny – 35 mln teńge», - dedi metsenat qalalyq ákimdik ótkizgen onlain brifingide.
Dizainer jaqyn adamǵa járdemdesý qazaq halqynyń qanynda bar qasiet ekenin aityp, áriptesterin, kún saiyn igi isterge muryndyq bolýǵa shaqyrdy.
«Qaiyrymdy ister marafony» aiasynda áleýmettik jobalarmen ainalysatyn úkimettik emes uiymdarǵa ózim keskindegen 7 esikti syiǵa tarattym. Olardyń jalpy quny – 4 mln teńge. Sonymen birge men avtovolonter retinde de «Rýhani jańǵyrý» jobalyq keńsesiniń jumystaryna atsalysamyn. Pandemiia kezinde muqtaj otbasylarǵa azyq-túlik pen turmysqa qajetti zattar jetkizip berdik. Barsha otandastarymyzdy, biznesmen áriptesterimdi qaiyrymdy ister aktsiia aiasynda ǵana emes, kún saiyn jasaýǵa úndegim keledi. Jaqynǵa járlemdesý – bizdiń qanymyzda bar qasiet. Sondyqtan ózimizdiń kim ekenimizdi umytpai, ainalamyzǵa kómektese júreiik», - dedi Mansýra Jáken.
