Qazaqstanda dizel tapshylyǵy joq. Mundai pikirdi táýelsiz sarapshy Oljas Baigeldiev aitty, dep habarlaidy QazAqparat.
«Jalpy elde dizel otynyna tapshylyq joq. Keibir janarmai beketterinde tapshylyq bolýy múmkin. Bul – qalypty jaǵdai. Máselen, dúken sórelerinde nan taýsylýy múmkin ǵoi. Ony basqa dúkennen satyp alýǵa bolady. Búgingi másele dál sondai», - deidi Oljas Baigeldiev.
Sonymen qatar, ol janar-jaǵarmai beketterinde paida bolǵan uzyn-sonar kezektiń de sebebin túsindirdi.
«Qazaqstanda tranzittik kólikterge janarmai quiylady. Aýyr kólikter júzdegen litr dizel quiady. Ol biraz ýaqytty alady. Dál osy kezde janarmai beketterinde kezek paida bolady. Adamdar alańdaityn nárse kórip turǵanym joq. Shymkenttegi munai óńdeý zaýyty jóndeýden keiin qaita iske qosylyp, óńirlerge dizel tasymaldaý jandandy. Al, baǵasyna keler bolsaq, bul osyndai sátti paidalanyp, paida tapqysy keletin jekelegen janarmai beketteriniń isi»,- deidi sarapshy.
QR Energetika ministrliginiń deregine súiensek, qazir munai ónimderiniń qory jetkilikti deńgeide.
«23 maýsymdaǵy jaǵdai boiynsha, Almaty qalasynda Ai-92 markaly benzinniń jiyntyq qory 30,3 myń tonnany quraidy. Bul, óńirdiń 19 táýliktik qajettiligin qamtýǵa jetkilikti. Dizel otyny boiynsha qor 10,9 myń tonnany quraidy. Bul, óńirdiń 18 táýliktik qajettiligin qamtýǵa jetkilikti. Ai-92 benzini boiynsha ai saiynǵy tutyný 48,9 myń tonnany (táýligine 1,6 myń tonna), dizel otyny boiynsha 18,3 myń tonnany (táýligine 0,6 myń tonna) quraidy.
Búgingi kúni Almaty qalasy JMQS-nyń AI-92 benzini boiynsha bólshek saýda baǵasy litrine 169-dan 175 teńgege deiin, dizel otyny boiynsha litrine 192-den 205 teńgege deiin diapazonda tur», - dep habarlady QR Energetika ministrliginiń baspasóz qyzmetinen.
