قازاقستاندا ديزەل تاپشىلىعى جوق. مۇنداي پٸكٸردٸ تەۋەلسٸز ساراپشى ولجاس بايگەلديەۆ ايتتى, دەپ حابارلايدى قازاقپارات.
«جالپى ەلدە ديزەل وتىنىنا تاپشىلىق جوق. كەيبٸر جانارماي بەكەتتەرٸندە تاپشىلىق بولۋى مٷمكٸن. بۇل – قالىپتى جاعداي. مەسەلەن, دٷكەن سٶرەلەرٸندە نان تاۋسىلۋى مٷمكٸن عوي. ونى باسقا دٷكەننەن ساتىپ الۋعا بولادى. بٷگٸنگٸ مەسەلە دەل سونداي», - دەيدٸ ولجاس بايگەلديەۆ.
سونىمەن قاتار, ول جانار-جاعارماي بەكەتتەرٸندە پايدا بولعان ۇزىن-سونار كەزەكتٸڭ دە سەبەبٸن تٷسٸندٸردٸ.
«قازاقستاندا ترانزيتتٸك كٶلٸكتەرگە جانارماي قۇيىلادى. اۋىر كٶلٸكتەر جٷزدەگەن ليتر ديزەل قۇيادى. ول بٸراز ۋاقىتتى الادى. دەل وسى كەزدە جانارماي بەكەتتەرٸندە كەزەك پايدا بولادى. ادامدار الاڭدايتىن نەرسە كٶرٸپ تۇرعانىم جوق. شىمكەنتتەگٸ مۇناي ٶڭدەۋ زاۋىتى جٶندەۋدەن كەيٸن قايتا ٸسكە قوسىلىپ, ٶڭٸرلەرگە ديزەل تاسىمالداۋ جانداندى. ال, باعاسىنا كەلەر بولساق, بۇل وسىنداي سەتتٸ پايدالانىپ, پايدا تاپقىسى كەلەتٸن جەكەلەگەن جانارماي بەكەتتەرٸنٸڭ ٸسٸ»,- دەيدٸ ساراپشى.
قر ەنەرگەتيكا مينيسترلٸگٸنٸڭ دەرەگٸنە سٷيەنسەك, قازٸر مۇناي ٶنٸمدەرٸنٸڭ قورى جەتكٸلٸكتٸ دەڭگەيدە.
«23 ماۋسىمداعى جاعداي بويىنشا, الماتى قالاسىندا اي-92 ماركالى بەنزيننٸڭ جيىنتىق قورى 30,3 مىڭ توننانى قۇرايدى. بۇل, ٶڭٸردٸڭ 19 تەۋلٸكتٸك قاجەتتٸلٸگٸن قامتۋعا جەتكٸلٸكتٸ. ديزەل وتىنى بويىنشا قور 10,9 مىڭ توننانى قۇرايدى. بۇل, ٶڭٸردٸڭ 18 تەۋلٸكتٸك قاجەتتٸلٸگٸن قامتۋعا جەتكٸلٸكتٸ. اي-92 بەنزينٸ بويىنشا اي سايىنعى تۇتىنۋ 48,9 مىڭ توننانى (تەۋلٸگٸنە 1,6 مىڭ توننا), ديزەل وتىنى بويىنشا 18,3 مىڭ توننانى (تەۋلٸگٸنە 0,6 مىڭ توننا) قۇرايدى.
بٷگٸنگٸ كٷنٸ الماتى قالاسى جمقس-نىڭ اي-92 بەنزينٸ بويىنشا بٶلشەك ساۋدا باعاسى ليترٸنە 169-دان 175 تەڭگەگە دەيٸن, ديزەل وتىنى بويىنشا ليترٸنە 192-دەن 205 تەڭگەگە دەيٸن دياپازوندا تۇر», - دەپ حابارلادى قر ەنەرگەتيكا مينيسترلٸگٸنٸڭ باسپاسٶز قىزمەتٸنەن.
