Qasym-Jomart Toqaev TMD-ǵa múshe memleketter basshylary keńesiniń keńeitilgen quramdaǵy otyrysyna qatysty, dep habarlaidy "Ult aqparat" Aqordanyń resmi saityna silteme jasap.
Qazaqstan Prezidentiniń tóraǵalyǵymen TMD-ǵa múshe memleketter basshylary keńesiniń keńeitilgen quramdaǵy otyrysy ótti.
Jiynǵa Ázerbaijan Prezidenti Ilham Áliev, Armeniia Premer-ministri Nikol Pashinian, Belarýs Prezidenti Aleksandr Lýkashenko, Qyrǵyzstan Prezidenti Sadyr Japarov, Resei Prezidenti Vladimir Pýtin, Tájikstan Prezidenti Emomoli Rahmon, Túrikmenstan Prezidenti Serdar Berdimuhamedov, Ózbekstan Prezidenti Shavkat Mirziioev, sondai-aq TMD Atqarýshy komitetiniń tóraǵasy Sergei Lebedev jáne Resei Federaldyq jinalysy Federatsiia keńesiniń tóraǵasy Valentina Matvienko qatysty.
Memleket basshysy búgingi is-shara TMD elderiniń COVID-19 pandemiiasynan keiingi alǵashqy tolyqqandy sammiti ekenin atap ótti.
- Shaǵyn quramda biz yntymaqtastyǵymyzdy odan ári nyǵaitýdyń ózekti máseleleri jóninde jan-jaqty pikir almastyq, Táýelsiz memleketter dostastyǵyn damytýdyń negizgi basymdyqtaryn aiqyndadyq. Bul COVID-19-dan keiingi TMD-nyń oflain formattaǵy alǵashqy tolyqqandy sammiti ekenin atap ótkim keledi. Jalpy, astanamyzda qaita bas qosýymyz qýanyshty jait, - dedi Qasym-Jomart Toqaev.
Memleketter basshylary birden resmi qujattarǵa qol qoiý rásimine kóshýge kelisti.
- Qajetti qujattarǵa qol qoiylyp jatqanda biz TMD Atqarýshy hatshysy laýazymyn TMD Bas hatshysy laýazymyna ózgertý týraly máseleni shaǵyn formatta talqylaǵanymyzdy jariialaǵym keledi. Atalǵan máselege qatysty men osyndai usynys jasadym. Sebebi keshe biz AÓSShK Atqarýshy hatshysy laýazymyn Bas hatshy laýazymyna ózgertý týraly sheshim qabyldadyq. Buǵan deiin ShYU-nyń Atqarýshy hatshysy da Bas hatshy laýazymyna ózgertildi. Negizinde, bul atqarýshy organ laýazymynyń mártebesin arttyrý úshin mańyzdy, - dedi Prezident.
Prezident sózin qorytyndylai kele, ótkizilgen sammittiń nátijeli bolǵanyn aitty.
– Qujattarǵa qol qoiý rásimi aiaqtaldy. Osylaisha, bizdiń otyrysymyz nátijeli boldy dep aitýǵa tolyq negiz bar. Sonymen qatar qujattardy qabyldaýdan bólek delegatsiia basshylary, meniń oiymsha, TMD sheńberindegi kópjosparly ózara is-árekettiń keń aýqymy jáne halyqaralyq kún tártibi jóninde óte paidaly pikirtalas ótkizdi. Osy rette aitylǵan mańyzdy usynystar men qaralǵan qujattar TMD keńistigindegi yntymaqtastyqty odan ári damytýǵa jáne jetildirýge baǵyttalady. Bul ortaq maqsatymyzǵa sai keledi. Sóz sońynda TMD Atqarý komitetiniń qyzmetkerlerine, bizdiń sarapshylarǵa, memleketter basshylary keńesiniń otyrysyn daiyndaýǵa jáne ótkizýge tikelei atsalysqan Dostastyqtyń barlyq organyna rizashylyǵymdy bildiremin, – dedi Qasym-Jomart Toqaev.
Sonymen qatar jiynda TMD Bas hatshysy Sergei Lebedev, Resei Federaldyq Jinalysy Federatsiia Keńesiniń tóraiymy Valentina Matvienko sóz sóiledi.
TMD memleketteri basshylary keńesiniń tóraǵasy, Qazaqstan Prezidenti Qasym-Jomart Toqaev Táýelsiz Memleketter Dostastyǵynyń gramotasyn memleketaralyq «Mir» teleradiokompaniiasynyń tóraǵasy Radik Batyrshinge tabys etti.
Kezdesý sońynda TMD-ǵa múshe memleketter basshylary Mádeniet salasyndaǵy yntymaqtastyqty damytý týraly málimdemege qol qoidy. Sondai-aq Dostastyqty odan ári damytýǵa baǵyttalǵan birqatar qujat qabyldandy.
