Shyǵys óńirine kelip jetken el Táýelsizdiginiń 25 jyldyǵyna arnalǵan «Táýelsiz Qazaqstan» poiyzy aldymen Aqtoǵai stansasyna at shaldyrdy. Respýblikalyq aktsiiaǵa qatysýshy Parlament Májilisiniń depýtattary, Qazaqstan halqy Assambleiasynyń músheleri jáne 7 ministrlik pen 2 ulttyq kompaniia, qarjy institýttarynyń ókilderinen quralǵan qadirli qonaqtardy qarsy alǵan aiagózdik aǵaiynnyń alabóten kóńili perrondy áp-sátte saltanatty kóńil-kúige bóledi. Vokzal basynda Muqaǵalidiń sózine jazylǵan Tursynǵazy Rahimovtyń áigili «Aiagóz arý» áni áýelep, el men jerdiń qasietin de asqaqtata túskendei.
Aýdan ákimi Baqytjan Baiahmetov uly Abai elindegi sapardyń Aiagóz jerinen bastalǵanyna qýanyshty ekenin jetkizip, Memleket basshysynyń kemel saiasatymen táýelsizdiktiń shirek ǵasyrlyq jasampaz kezeńinde aiagózdikterdiń de talai biikterdi baǵyndyrǵanyn atap ótti. Qozy men Baiannyń eli, áigili jyraýlar men batyrlardyń jurty – aiagózdikterdiń ystyq yqylasyna yrza ekenin jetkizgen «Táýelsiz Qazaqstan» poiyzy shtabynyń jetekshisi, L.Gýmilev atyndaǵy EUÝ-niń professory Ámirjan Álpeiisov: «Elordamyzdan shyqqan «Táýelsiz Qazaqstan» poiyzy Elbasymyzdyń bastamasymen elimizdiń 25 jylda qol jetkizgen tabystary men jetistikterin el arasynda nasihattaýdy, halyqtyń tynys-tirshiligin kózben kórip, ózekti máseleleriniń sheshimin tabýǵa qol ushyn sozýdy kózdeidi. Osy maqsatta quramymyzda bilikti dárigerler men túrli saladaǵy kásibi mamandar da Shyǵys óńirine arnaiy keldi, – dedi. Al Parlament Májilisiniń depýtaty Nurlan Dýlatbekov zań jobalaryn daiyndaý men qabyldaý barysynda halyqtyń oi-usynystarynyń óte mańyzdy ekenin, sondyqtan bul sapardan kóp nátije kútetinin jetkizdi.
Aqtoǵai kenti – temir joldyń boiynda, toǵyz joldyń torabynda turǵan kóliktik logistikalyq áleýeti zor eldi-mekenniń biri. Qazirgi kezde kent halqynyń basym bóligi temir jol salasynda jáne Aqtoǵai taý-ken baiytý kombinatynda eńbek etedi. Aktsiiaǵa qatysýshylar óńirdegi ǵana emes, elimizdegi eń iri óndiristik jobalardyń birine sanalatyn Aqtoǵai taý-ken baiytý kombinatynyń qyzmetimen tanysty. Álemdegi igerilmegen alyp kenishter qataryna jatatyn ken orny byltyr totyqty kennen tuńǵysh katodty mys ónimin alǵan bolatyn. Osylaisha, Aiagóz aýdanyndaǵy alyp óndiristiń órisi ashyldy. Sodan beri kásiporynda milliard teńgeniń ónimi óndirilip, 83 paiyzǵa teń óndiristik qýatyna shyqty. Kombinatta totyqty kendi óndirý men óńdeý 11 jylǵa eseptelgen. Kenishtiń keleshegi sýlfidti ken kontsentratyn alýda jatyr. Zertteý jumystarynyń nátijesi kórsetkendei, onyń negizgi qory – 1,5 mlrd. tonna. Sýlfidti zaýytty biyl Táýelsizdiktiń 25 jyldyq merekesi aiasynda iske qosý josparlanyp otyr.
Bul kúni memlekettik jáne kásipkerlik qurylymdarda, aýyl sharýashylyǵynda jáne ózge de salalarda eńbek etip júrgen aýdan turǵyndary Astanadan kelgen ortalyq memlekettik jáne quqyq qorǵaý organdary men qarjy institýttary mamandarynan keńes aldy. Kei turǵyndar kókeidegi máselelerdiń sheshimin tapsa, keibiri saýaldyń jaýabyna qanyqty. Jergilikti lokomotiv paidalaný deposynda ótken qoǵamdyq qabyldaý barysynda Aqtoǵai aýyldyq aqsaqaldar keńesiniń tóraǵasy, qurmetti temirjolshy Bolatbek Mámbetov jastardyń bos ýaqytyn tiimdi ótkizý maqsatynda aýylǵa sport kesheni qajet ekendigin jetkizdi. Sondai-aq buryn bastalǵan Aiagóz ben Lepsi baǵytynan keletin tasjoldar qurylysynyń aiaqsyz qalýyna bailanysty jol máselesiniń óte ózekti kúiinde qalyp otyrǵanyn jetkizdi. Iaǵni, temirjoldan ózge joldar tuiyqtalyp tur. Bul másele kent ishindegi kóshelerge de qatysty. Temirjolshy Rahmetolla Shaltaev osy saýaldyń sheshimin tabýǵa kómek kórsetýdi ótindi. Al zeinetker Arynbai Asamurzinniń mal basyn ósirý oraiyndaǵy saýalyna jaýap bergen Májilis depýtaty N.Dýlatbekov jýyrda jaiylym týraly arnaiy zańnama qabyldanatynyn, jobanyń Parlament otyrysynyń birinshi oqylymynan ótkenin aitty. Qabyldaýdy uzaq kútken temirjolshy Gúlbarshyn Sadyqova balasynyń zańger biliktiligin alsa da eki qolǵa bir jumys tappai júrgenin aitsa, múgedek enesine qarap otyrǵan Gúljan Ǵabbasova da jumyssyzdyq máselesi qinaitynyn jetkizdi. Bul rette aktsiia jetekshileri «Jumyspen qamtý-2020» baǵdarlamasy aiasynda shaǵyn kásipkerlikpen shuǵyldaný múmkindikteri bar ekenin atap ótip, aýyl ákimi Zaiyr Kesikbaevtan máseleniń sheshimin tabýdy ótindi. Kent basshysy táýelsizdik merekesi aiasynda ashylatyn áleýmettik nysandar esebinen sheshimin qarastyratynyn jetkizdi. Qabyldaýda turǵyndar áleýmettik jeńildikter, zeinetaqy, qujat, zańdastyrý, kásipkerlikke arnalǵan nesieler syndy san túrli saýaldardyń jaýabyn aldy.
Eń bastysy, Aqtoǵai kenti men mańaidaǵy eldi-mekenderdiń turǵyndary tegin meditsinalyq tekserýden ótip, densaýlyǵyna bailanysty bilikti dárigerlerdiń qabyldaýynda boldy. Máselen, almatylyq bilikti endokrinolog-dáriger Gaýhar Bógenbaevanyń aitýynsha, keibir jergilikti turǵyndar densaýlyǵynda kinárat bolsa da mán bermei júre bergeni belgili boldy. Bul arada endroklinologiialyq dárigerlik kómektiń iri qalalarda da qoljetimdi bolmaýy keri áserin tigizgenin aita ketý kerek. Skrinigtik tekserýden ótken aqtoǵailyq turǵyndar osyndai áleýmettik jobalar jii qolǵa alynsa degen tilegin jetkizdi.
Qazirgi kezde kentte 7 myńǵa jýyq halyq turady. Bul – aýdandaǵy Aiagóz qalasynan keiingi iri eldi-meken. Aýylda eki mektep bar. Atalǵan bilim ordalary tarlyq etip otyrǵandyqtan biyl eski meshit ǵimaratyn jóndeýge jergilikti biýdjetten 18 million teńge bólingen. Jańa jylda onda bastaýysh mektep ashylyp, 62 oqýshy bilim almaq. Sondai-aq buryn mi batpaq bolyp jatatyn kenttiń ortalyq eki kóshesi asfalttalyp, jaryqtandyryldy.
«Aýdanda eldi-mekenderdi damytýdyń úsh jyldyq jospary qabyldanǵan. Óńirlerdi damytý baǵdarlamalary arqyly bul jumystardy aldaǵy ýaqytta jalǵastyramyz», deidi aýdan ákimi B.Baiahmetov.
Meimandar №8 orta mektepte tarih pániniń muǵalimi Kúlásh Muhamadieva daiarlaǵan ótken dóńgelek ústelge qatysyp, oqýshylardyń interaktivti bilim deńgeiine kýá boldy. Sondai-aq Tańsyq aýylynyń janyndaǵy Qozy Kórpesh-Baian Sulý kesenesine taǵzym etip, aýdan ónerpazdarynyń ónerlerin tamashalady.
«Táýelsiz Qazaqstan» poiyzy shtabynyń basshysy Ámirjan Álpeiisov Aqtoǵai aýylyndaǵy bir kúndik jumysty qortyndylap, is-sharaǵa 1700-ge jýyq adam qamtylǵanyn jetkizdi. Máselen, jyljymaly diagnostikalyq ortalyqta 450 adam dárigerlik-skrinigtik tekserýden ótýge múmkindik alsa, 120 adamǵa kásipkerlik, aýyl sharýashylyǵy jáne áleýmettik salalar boiynsha konsýltatsiialyq keńes berildi. Poiyzdyń óńirdegi endigi baǵyty Óskemen men Semei qalalary jáne Degeleń stansasy arqyly jalǵasady.
Dýman ANASh,
«Egemen Qazaqstan»
Shyǵys Qazaqstan oblysy,
Aiagóz aýdany.
.jpeg)