Almatyda taýda joǵalǵan Ásel Panarǵalievanyń týystary ol týraly kez-kelgen aqparatqa aqshalai syiaqy beriletindigin jariialady, – dep habarlaidy QazAqparat. Qutqarýshylar qyzdy 11 kúnnen beri izdep jatyr.
«Ázirge eshqandai habar joq. Amaldyń joqtyǵynan kez-kelgen aqparat bergen adamǵa syiaqy taǵaiyndap jatyrmyz. Sebebi, bizde basqa amalymyz qalmady. Ony bireýler zorlyqpen ustap otyrýy da ǵajap emes. 26 jastaǵy ózi ómirine ózi jaýap bere alatyn qyz ózdiginen mundai qadamǵa barmasy anyq. Buǵan deiin 1 ai Aqtaýda bolǵan, odan keiin 1 ai Túrkiiada boldy. Jaman ádetten ada. Taýdy óte jaqsy kóretin. Ár senbi-jeksenbi taýǵa shyǵatyn. Áleýmettik jelide tarap jatqan telefon týraly aqparatty qazir politsiia tekserip jatyr. Onyń bári áli anyqtalmaǵan aqparat» dedi qyzdyń jeńgesi Marjan Izǵali.
Qazir QR IIM TJK Respýblikalyq jedel qutqarý jasaǵy izdeý jumystaryn jalǵastyryp jatyr. Eske salaiyq, boijetkenniń joǵalǵany týraly 10 qarasha kúni belgili boldy. Ol taý týrizmmen ainalysyp júrgen. 9 qarasha saǵat 13:00 shamasynda ol Úlken Almaty (Josaly) kólinde túsken fotosyn áleýmettik jelige jariialaǵan. Odan keiin bailanysqa shyqpaǵan.
Buǵan deiin júrgizilgen izdestirý jumystary qyzdyń týystarynyń ótinishi boiynsha toqtatylǵan bolatyn. Biraq keiin Á.Panarǵalievanyń jaqyndary izdestirýdi jalǵastyrýdy qaita surady. Sonymen qatar, qyzdy izdestirýge alpinister de jumyldyryldy. Munyń aldynda Kosmostantsiia aýdanynda 9 qarashada saǵat 13:00-der shamasynda qyzdyń taýdan túsip kele jatqanyn adamdar kórgen. Odan keiin politsiia qyzdyń telefony arqyly qalanyń ár buryshynan telefon qońyraýlary jasalǵanyn anyqtady.
