Almatynyń taýlary qalanyń basty nyshandarynyń birine ainalǵan. Alaida zamanaýi taý infraqurylymynyń mindeti tek tájiribeli shańǵyshylar men týristerdi qabyldaýmen shektelmeýi tiis. Ol belsendi demalysty qala turǵyndarynyń kúndelikti ómiriniń bir bóligine ainaldyrýǵa jaǵdai jasaýy qajet. Almaty SuperSki jobasynyń negizinde de dál osy ustanym jatyr, dep habarlaidy ult.kz.
Bolashaq taý-shańǵy kýrorty keń aýditoriiaǵa baǵyttalady. Munda shamamen 60 shaqyrym taý-shańǵy trassasyn salý josparlanǵan. Onyń 70 paiyzǵa jýyǵy balalar men shańǵy tebýdi jańadan bastaǵandarǵa arnalǵan. Kýrort táýligine 10 myńnan astam shańǵyshyny qabyldai alady. Iaǵni infraqurylymnyń eleýli bóligi taý shańǵysymen alǵash ret ainalysatyn adamdardyń qajettilikterin eskere otyryp qalyptastyrylady.
Bul taý demalysyna degen kózqarasty da birtindep ózgertýi múmkin. Balanyń alǵash ret shańǵyǵa turýy, otbasynyń demalys kúnin taýda ótkizýi nemese buryn shańǵy teppegen eresek adamnyń alǵashqy sabaǵy saiabaqta serýendeý nemese qala syrtynda demalý sekildi qalypty ári qoljetimdi demalys túrine ainalmaq.
Jobada balalarǵa erekshe nazar aýdarylady. Almaty qalasynyń ákimdigimen birlesip kýrort aýmaǵynda dene shynyqtyrý sabaqtaryn ótkizý múmkindigi qarastyrylýda. Mundai bastama oqýshylar úshin sabaqtyń jańa formatyn qalyptastyryp qana qoimai, olardyń qysqy sport túrlerimen erte jastan tanysýyna jol ashady. Balalardy sportqa jappai tartý bolashaqta eldiń sporttyq rezervin qalyptastyrýǵa da qosymsha múmkindik beredi.
Sonymen qatar Almaty SuperSki tek jańadan bastaýshylarǵa arnalmaidy. Ártúrli deńgeidegi trassalar tájiribeli shańǵyshylar men kásibi sportshylarǵa da jattyǵýǵa múmkindik beredi. Zamanaýi taý-shańǵy infraqurylymynyń keńeiýi qysqy sport túrlerin damytýǵa jáne sportshylardy daiarlaýǵa qosymsha jaǵdai jasaidy.
Taýdyń fizikalyq qoljetimdiligin arttyrý da jobanyń mańyzdy bóligi sanalady. Joba aiasynda 11 zamanaýi aspaly jol salý kózdelgen. Jańa infraqurylym kelýshilerge «Medeý» tómengi stantsiiasynan teńiz deńgeiinen shamamen 3400 metr biiktiktegi Kúmbel aimaǵyna deiin kóterilýge múmkindik beredi.
Almaty SuperSki tek qysqy maýsymǵa arnalǵan nysan retinde qarastyrylyp otyrǵan joq. Tujyrymdama jyl boiy jumys isteitin infraqurylymdy, onyń ishinde jaiaý taý baǵyttaryn, velosiped marshrýttaryn jáne basqa da belsendi demalys túrlerin damytýdy qamtidy. Demek, taýǵa barý múmkindigi jyldyń birneshe aiymen ǵana shektelmei, barlyq maýsymda qoljetimdi bolmaq.
Osy turǵydan alǵanda, jobanyń mańyzy jańa kýrort salýmen ǵana ólshenbeidi. Almaty SuperSki belsendi ómir saltyn qalyptastyrýǵa, al taýdy tek kásibi sportshylar men tájiribeli týristerge arnalǵan keńistik emes, kópshilik úshin qoljetimdi demalys ornyna ainaldyrýǵa baǵyttalǵan.
Almaty SuperSki kimderge arnalǵan? Alǵash ret shańǵyǵa turatyn balaǵa. Demalys kúnin taýda ótkizgisi keletin otbasyna. Sheberligin arttyrýdy kózdeitin áýesqoiǵa. Zamanaýi jattyǵý infraqurylymyn qajet etetin sportshyǵa. Sondai-aq shańǵy teppese de, taýǵa kóterilip, serýendep, Almatyny jańa biiktikten kórgisi keletin árbir adamǵa.
Jobanyń basty nátijeleriniń biri dál osy buqaralyq qoljetimdilik bolýy múmkin. Iaǵni adamdardy taýǵa jaqyndatý ǵana emes, taýdy Almatynyń kúndelikti ómiriniń ajyramas bóligine ainaldyrý.
