Taraz sotynda Erjan Tátishevtiń oqqaǵary bankirdiń ólimi qalai bolǵanyn aityp berdi, - dep habarlaidy Tengrinews.kz tilshisi.
Munyń aldynda biznesmen Murathat Toqmádige qatysty qylmystyq is boiynsha basty sot otyrysy bastalǵany habarlanǵan edi. Oǵan 1997 jylǵy redaktsiiadaǵy QR Qylmystyq kodeksiniń 96-babynyń 2 tarmaǵy - "j, z" boiynsha aiyp taǵylyp otyr.
Sotta biznesmen "Bank Turan Álem" AQ eks-basqarma tóraǵasy Erjan Tátishevti óltirgenin moiyndaǵan edi. "Kináńizdi moiyndaisyz ba?", - dep surady sýdia. "Iá", - dep jaýap berdi Murathan Toqmádi. "Tolyqtai moiyndaisyz ba?", - dep naqtylady sýdia. "Iá", - dep jaýap berdi biznesmen.
Tátishevtiń oqqaǵary Sergei Kozlihinniń aitýynsha, sol kúni bastyǵy men Toqmádi qasqyr atýǵa shyqqan.
"Toqmádige oń qolymen qarýdy alyp, "Máke, mine" dep, kóliktiń aldyńǵy eki oryndyǵynyń ortasynan beredi. Osy kezde Toqmádidiń Tátishevtiń artynda, júrgizýshi oryndyǵynyń artynda otyrǵanyn naqty kórdim. Onyń qarýdy alǵany aiqyn kórindi. Qarý sol kezde qulyptaýly boldy ma, joq pa - muny aita almaimyn. Shynymdy aitsam, kórmedim. Tátishev maǵan: "oń jaq terezeni túsir" dedi, sebebi qasqyrlardyń biri oń jaqqa qarai ketip bara jatqan. Osy kezde men terezeni túsirip jattym, 2-3 sekýnd ótti, osy kezde art jaqta qarý atyldy", - dedi sotta Kozlihin.
Onyń aitýynsha, ol dereý janyna qarap, Tátishevtiń máiitin kórgen.
"Men artyma qaradym, qolynda qarýy bar, oń jaqta otyr, meniń artymda. (...) Oń qoly shúrippede boldy. (...) Bastyǵyma qarap, onyń rólge súienip jatqanyn kórdim, kózi shyǵyp ketken, terisi qaraýyta bastady, kók túske ainala bastady. Dereý jyldamdyqty azaittym. Saǵatyna 60-70 shaqyrymmen kele jatqanbyz", - dedi er adam.
Aitýynsha, kólik toqtaǵannan keiin Toqmádidi kólikten alyp shyǵypty.
"Atyp shyǵyp, ony kólikten túsirdim. Ne istediń dedim. Ol bolsa, Sergei, túsinesiń ǵoi, men alǵym kelmedi, ózi aldy deidi. Qalai atqanyn ózim de túsinbei qaldym. Ol qaita-qaita beti beri qaramaitynyn aitýmen boldy. Aǵaryp ketti, esin joǵalta bastady", - dedi Kozlihin.
Sondai-aq, Bas prokýratýra aǵa prokýrory Iliias Ysqaliev is materialdarynan kózbe-kóz bettestirýlerdiń birinde Muhtar Ábliazovtiń aqshalai syiaqy úshin Tátishevti abaisyzda atyp alǵandai qylyp óltirip, ármen qarai biznesine ie bolýdy usynǵanyn aitty.
"Toqmádidi asa aýyr qylmys jasaýǵa úgittegen Ábliazov oǵan qarsy bolǵan jaǵdaida organdardaǵy jáne arnaiy qyzmetterdegi bailanysy arqyly onyń buǵan deiin jasaǵan qylmystary úshin qýdalaýǵa ushyratatynyn aityp, qorqytty. Óz kezeginde Toqmádi úgitine túsip, zulymdyq nietpen 2004 jyldyń jazynda Almatyda 4 million dollar úshin Tátishevti óltirýge kelisim beredi. Sonymen qatar, Ábliazov Toqmádige biznesine qoldaý bildirýge kepil beredi. Ábliazov óz tapsyrmasyn oryndatý úshin kisi óltirýge tapsyrys berýshi retinde 2004 jyly Toqmádige alǵashqy tólemi retinde ýáde etilgen aqshalai syiaqynyń 2 million dollaryn belgisiz tulǵalar arqyly qolma-qol sanap bergen", - dep oqydy prokýror aiyptaý aktisin.
Osyǵan deiin Murathan Toqmádidiń Taraz qalasynyń sotyna jetkizilgeni habarlanǵan bolatyn.
"05.02.2018 Jambyl oblysynyń Qylmystyq ister jónindegi mamandandyrylǵan aýdanaralyq sotyna M.Sh. Toqmádige qatysty 96-baptyń 2 tarmaǵy "j, z" boiynsha qylmystyq is kelip tústi. Is materialy boiynsha, Almaty qalasynda qylmystyq álemniń "bedeldisi" jáne "Depýtattyq korpýs" UQT basshysy M.Sh.Toqmádi "Bank Turan Alem"AQ basqarmasynyń burynǵy tóraǵasy E.N.Tátishevti óltirdi dep aiyptalyp otyr. Bul qylmystyq is "Tórelik" aqparattyq júiesimen sýdiaǵa qarastyrýǵa úlestirilgen. Qylmystyq isti qaraýdyń merzimi men kúni belgilenbedi", - dep habarlaǵan edi Jambyl oblysynyń Qylmystyq ister jónindegi mamandandyrylǵan aýdanaralyq sotynyń baspasóz qyzmetindegiler.
Eske sala keteiik, Murathan Toqmádi byltyr 12 maýsymda ustalǵan bolatyn. Almatyda arnaiy qyzmet "Depýtattyq korpýs" atty qylmystyq topty ustaý boiynsha operatsiia ótkizgen edi. BAQ-ta shyqqan aqparat boiynsha, bul qylmystyq topty "QazShynyQurylys" zaýytynyń iesi Murathan Toqmádi basqarǵan. Sondai-aq, prokýratýra málimetinshe, onyń úiin tintý kezinde qarý-jaraq pen oq-dári tabylǵan. Al taiaýda biznesmenge qatysty úkim shyqqan. Murathan Toqmádi 3 jylǵa bas bostandyǵynan aiyrylǵan bolatyn.
