Tatarstan mektepterinde Altyn Ordanyń 750 jyldyǵyna arnalǵan sabaqtar ótedi. Bul týraly TR Ǵylym akademiiasy Tarih institýtynyń janyndaǵy Altyn Orda jáne tatar handyqtaryn zertteý ortalyǵynyń basshysy, tarih ǵylymdarynyń kandidaty Ilnýr Mirgaleev aityp berdi, dep habarlaidy QazAqparat «Tatar-inform» agenttigine silteme jasap.
«Bilim ministrligine oqytýshylarǵa arnalǵan oqý quralyn ázirlep berdik. Tarih pániniń oqytýshylary osy kúnge arnalǵan sabaq ótýi tiis. Biz olarǵa memleket tarihynyń asa mańyzdy oqiǵalary qamtylǵan qysqasha aqparatty jiberemiz», - dedi ol.
Tarihshynyń sózine qaraǵanda, ádistemelik quralda Altyn Orda tarihyndaǵy negizgi oqiǵalar men tulǵalar atalady, ári osy taqyrypqa qatysty usynylatyn kitaptardyń tizimi beriledi.
«Bilim berý júiesi osy aqparatty turǵyndarǵa jetkizýde bizge kómektesedi dep úmittenemiz. Óitkeni bul tek oqýshylarǵa ǵana emes, ata-analarǵa da qyzyqty. Konferentsiialar, ashyq sabaqtar ótkizýge bolady. Tarih pániniń bir sabaǵyn dál osy taqyrypqa arnaýǵa da bolady. Mektepter kóptegen sharalardy ótkizedi, jurt tatar tarihyna, tatar memlekettigine arnalǵan sharalardyń mańyzyn tolyq túsinedi dep senemiz», - deidi Ilnýr Mirgaleev.
