Foto: gov.kz
Tasqyn aqparattyq júiesi biyl 14 naýryz ben 18 sáýir aralyǵynda Qazaqstannyń 10 oblysyndaǵy sý tasqyny jaǵdaiyn boljap, modeldedi, dep habarlaidy Ult.kz.
Modeldeý Batys Qazaqstan, Aqtóbe, Qostanai, Soltústik Qazaqstan, Pavlodar, Shyǵys Qazaqstan, Aqmola, Qaraǵandy, sondai-aq Abai jáne Ulytaý oblystarynyń eldi mekenderine júrgizildi. Bul rette júie Aqmola jáne Soltústik Qazaqstan oblystaryndaǵy naqty sý basqan 16 eldi mekenniń 9-yna aldyn ala boljam jasady.
Tasqyn júiesi tasqyn sýdy modeldeý kezinde ózenderdegi boljamdy sý shyǵyny men deńgeiin, qoimalardan sý jiberý kólemin, jer bederiniń tsifrlyq modelderin jáne batimetriialyq túsirilim derekterin paidalanady. Sý resýrstary jáne irrigatsiia ministrligi sý tasqyny kezinde kún saiyn aqparattyq júiege derekterdi engizý jáne jańartý arqyly sý qoimalarynyń jai-kúiine monitoring júrgizdi. Sondai-aq vedomstvo shekara mańyndaǵy eldermen ózara is-qimyl jasap, TJM men onyń aýmaqtyq bólimshelerin tótenshe jaǵdailardyń týyndaý qaýpi týraly ýaqtyly habardar etip otyrdy.
"Boljamdardyń dáldigin arttyrý jáne Tasqyn júiesin qamtýdy keńeitý úshin ýákiletti memlekettik organdar ony odan ári damytý úshin usynystar ázirledi. Tsifrlyq jer bederiniń anyqtyǵyn arttyrý, gidrologiialyq modeldi jetildirý jáne beiimdeý, júieni jańǵyrtýǵa baǵyttalǵan is-sharalar engizilgen Jol kartasynyń jobasy ázirlendi. Tasqyn aqparattyq júiesin jetildirý jumysy turaqty negizde júrgizilip jatyr jáne aldaǵy ýaqytta da jalǵasyn tabady", – dedi Sý resýrstary jáne irrigatsiia ministri Aslan Abdraimov.
