Qazaqstannyń Reseidegi elshisi Imanǵali Tasmaǵambetovtiń qyzy Asel Tasmaǵambetova óz qarajatyna Almaty qalasynyń quramyna kiretin Aqjar aýylynda mektep saldy. Bul týraly belgili kásipker Beibit Álibekov Instagram jelisindegi paraqshasynda habarlady, dep jazady kaz.tengrinews.kz.
"Osyndai tamasha ári jarqyn merekede meniń qurbym Asel jáne onyń "Sábi" qory armanyn oryndady - Naýryzbai aýdanyndaǵy Aqjar aýylynda 1200 bala endi jańa mektepte oqidy. Memleketten bir tiyn almai, ol 1200 balaǵa arnalǵan mektep-gimnaziiasyn saldy. Ol 10 bloktan turady, aýmaǵy - 11 625 sharshy metr. Asel men onyń dostary mektepti aýyl turǵyndaryna syilady jáne ákimdik balansyna berdi. Asel kez kelgen protseske aralasyp, bizdiń balalar úshin shyn máninde zamanaýi mektep salyp shyqty. Osyndai adamdar kóbirek bolsa, bizge 100 mektep jáne aýrýhana baǵdarlamasy kerek te bolmai qalady. Barlyǵy tapqan tabysyn ózimen birge alyp ketpesin biledi, sol sebepti de qoldan kelgenin istep jatyr. Osy mysal barlyǵyna ynta bereri sózsiz", - dedi Álibekov.
Mektep salý týraly taǵy bir qazaqstandyq kásipker Qairat Qudaibergen de aityp qaldy. "Kásipkerlerdiń oqýshylarǵa 1 milliard 725 million teńgege syilyǵy. Búgin Keńes Raqyshev pen Asel Tasmaǵambetova ("Sábi" qory) Aqjar aýylyna mektep syiǵa tartty! 1 725 000 000 teńge, 11,625 sharshy metr, 10 blok, 1200 oryn - Aqjardaǵy jańa mektep jaily esep osy. Keńes pen Asel bul jobaǵa investitsiia quiyp qana qoimai, jobanyń iske asýyna jáne kez kelgen detalǵa mán berip, mekteptiń sapaly bolýyna óz úlesin qosty. Sondyqtan da bul mektep ashyq, óte tiimdi, innovatsiialyq jáne oilastyrylyp istelgen nysan boldy. Mektep ishinde eń myqty synyptar, eń úzdik ashana, sport zaly (keibir fitnes zaldary bul mekteptiń sport zaldaryna qyzyǵýshylyqpen qaraidy), kerek deseńiz "Aqua Point" innovatsiialyq qurylǵysy ornatylǵan, oqýshylar men muǵalimder úshin tazartylǵan sý da bar. Qor tek bilim ordasyn salyp berip qana qoimai, jas kásipkerlerdi qoldady. Men osy Aqjardaǵy 174 mektep-gimnaziiasynyń elimizdegi eń sapaly, bezendirilýi jáne bilim sapasy eń joǵary mektepterdiń birine ainalatynyna senimim mol. Dál osyndai mysaldar men bastamalar kásiptiń áleýmettik jaýapkershiliktiń flagmany bolýy tiis. Raqmet sizderge, Keńes pen Asel! Sizder elimizdiń naǵyz patriotysyzdar!", - dep jazdy ol Instagram paraqshasynda.
Asel Tasmaǵambetova - premer-ministrdiń burynǵy orynbasary Imanǵali Tasmaǵambetovtiń úlken qyzy. 1979 jyly dúniege kelgen. Belgili kásipker Keńes Raqyshevtiń jary. "Sábi" (jetim balalarǵa, densaýlyǵynda aitarlyqtai kemistigi bar sábilerge, sondai-múmkindigi shekteýli azamattarǵa kómek beretin uiym). Jekemenshik qaiyrymdylyq qoryn basqarady.
