Qazaqstan Respýblikasynyń Tótenshe jáne Ókiletti Elshisi Imanǵali Tasmaǵambetov Resei elindegi Germaniia Federativti Respýblikasynyń uiymdastyrýymen ekonomikalyq baǵytta órbigen "Eýropalyq keńes – Eýraziialyq Ekonomikalyq Odaq" atty pikirtalas alańyna qatysty.
Osy jiynda sóz sóilegen Elshi myrza "Eýraziialyq Ekonomikalyq Odaqtyń negizi qalanyp, onyń ári qarqyn alýy eń aldymen Qazaqstan Prezidenti Nursultan Nazarbaevtyń arqasynda bolǵanyn" erekshe atap ótti.
"Eýropalyq Odaq qalyptasqan úrdis boiynsha Eýraziialyq ekonomikalyq odaqtyń saýda-sattyq salasy boiynsha negizgi seriktesine ainalǵan. EEO elderi Eýropalyq odaqtyń syrtqy saýda kólemi boiynsha 50 %-dan joǵary úlesin ielenýde", – dedi Imanǵali Tasmaǵambetov.
Tehnologiialardyń beleń alyp, taýarlardyń naryqqa túspei jatyp kóneretin zamanynda qalyptasqan júie boiynsha jumys túzý múmkin emes. Sol sebepti taýarlardy jetkizý kezinde onyń ózindik qunyna qaraǵanda tasymalyna ketetin ýaqyt shyǵynyn esepteý áldeqaida mańyzdy.
Osy rette, Eýropa men Aziiany qosatyn, shóldi dalamen ótetin transeýraziialyq joldyń sý qatynasynan artyq ekenin Elshi qadap aitty.
"Qazaqstan buǵan tolyǵymen ázir. Elimizde memlekettik baǵdarlama túgelimen júzege asyp otyr. 26 jyldyń aralyǵynda 10 myń shaqyrym jol jańartylyp, jóndeldi. Jýyrda 8000 shaqyrym avtojol qoldanysqa beriledi. Munymen qatar, 2,5 myń shaqyrym temir jol iske qosyldy", – dedi Imanǵali Tasmaǵambetov.
Pikir talas alańynda "Eýraziialyq ekonomikalyq odaq – saýda sattyq saiasatynyń ustanymy" atty saraptamalyq jumys kópshilik nazaryna usynyldy. Onda kóptegen qajetti aqparat men málimetter jiyntyǵy berilgen.
.jpeg)