- Memleket azamattyq qoǵam institýttaryn qoldaýdy bir sátke de toqtatqan emes. Búgin 7-shi Azamattyq forýmda sóz sóilegen QR Premer-Ministrdiń orynbasary Imanǵali Tasmaǵambetov osylai aitty, dep habarlaidy Ult.kz tilshisi QazAqparat agenttigine silteme jasap.
«Az ýaqyttan soń búkil el bolyp memleketimizdiń mártebeli meiramy Tuńǵysh Prezident kúni men ultymyzdyń ulyq merekesi Táýelsizdiktiń 25 jyldyǵyn atap ótemiz. Olai bolsa búgingi júzdesýimizdi de aq tilekten bastap, barshańyzdy el ómirinde erekshe orny bar osynaý mándi de maǵynaly merekelermen shyn júrekten quttyqtaýǵa ruqsat etińizder. Sóz joq, osynda otyrǵan kópshiliktiń el damýyna qanshalyqty úlesterińiz mol bolsa Táýelsizdigimiz ben Elbasynyń da ózderińiz tasyn órge domalatyp júrgen úkimettik emes uiymdardyń ósip-órkendeýindegi róli de talassyz. Óitkeni, egemendiktiń osy shirek ǵasyrynda ashyq qoǵamnyń paida bolýyna sebep Táýelsizdik bolsa, onyń damýyn jan-jaqty jaǵdai jasaǵan, árine, Elbasymyzdyń saliqaly saiasaty», - dedi Tasmaǵambetov.
Osy oraida vitse-premer onyń kóp kýáligin tizbei-aq bir ǵana dálelmen aityp ótti.
«Kezinde, sonaý Táýelsizdiktiń alǵashqy jyldary Elbasyǵa túrli saiasi qoǵamdyq kúshterden «bir ulttyq respýblika bolaiyq ia bolmasa qazaq memleketin ornataiyq» degen siiaqty kóptegen usynystar aitylǵan kezde Nursultan Ábishuly «zaiyrly eldiń adamdary ózderin hristian da, musylman da, kedei de, bai da emes eń aldymen azamat sezinýi kerek. Endeshe biz ulttyń ne dinniń emes tutas azamattardyń qoǵamyn qurýymyz kerek» degen edi. Búgin mine, osy qanatty qaǵidanyń zańdy jemisi elimizdegi uzyn-sany 18 myńnan asatyn úkimettik emes uiymdardyń betke ustar eń belsendi azamattary elorda tórinde jinalyp, azamattyq qoǵamnyń kezekti jetinshi forýmynda alqa quryp otyr. Bos otyrmai tańerteńnen beri qyzý jumysqa kirisip, birqatar máseleni talqylady. Ol solai bolýy da kerek. Sebebi azamattyq forým degenimizdiń ózi bir ujymnyń ne bir uiymnyń kúndelikti ótetin jinalysy emes. Pikirtalasy qainaǵan, áleýmetiniń ainasyn aishyqtap, osyǵan orai usynys-tilegin daiyndaǵan naǵyz oily da, oramdy orta. Onyń qoǵamǵa berer qundylyǵy da, memleketke kerek shyndyǵy da mine osynda. Sondyqtan da memleket azamattyq qoǵam institýttaryn qoldaýdy bir sátke de toqtatqan emes», - dedi ol.
.jpeg)