Birneshe kún buryn Aqtóbe qalasy, Mahambetovka aýylyndaǵy tasqyn sý kezinde 10 jastaǵy Mahabbat Eshimovanyń búkil oqýlyǵy sýǵa ketip qalǵan bolatyn. Búgin jergilikti ákimdik onyń bar-joǵyn túgendep bergenin aitty, dep habarlaidy QazAqparat tilshisi.
Aqtóbe qalasy, Mahambetovka aýylynyń bar zary bir oqýshynyń kóz jasymen este qaldy. 10 jastaǵy Mahabbat Eshimova óz oiyn ashyq jetkizip, sý tasqynyna jaýapty basshylardan topan sýdyń sebebin surady. Júregi aýyratyn ata-anasyna ýaiymdaǵan oqýshynyń otbasy ózgeler sekildi qolyna ilikkenin qutqardy. Qujattarynan ózgesi sý ishinde tur. Mektep oqýshysy qoǵamdaǵy bul dúrbeleńdi kórip, óz basyndaǵy aýyr haldi baiandady. Oqýlyǵynyń sýda qalǵanyn aityp, kóptiń kóńilin bosatty.
Al búgin «Aqtóbe aqparat» ortalyǵy Mahabbat Eshimovanyń otbasyna áleýmettik kómek berilgenin jetkizdi.
«Tasqynnan zardap shekken aqtóbelik otbasylardyń balalary oqýlyqtarmen qamtamasyz etilip, sabaqqa baryp júr. Kóktemgi sý tasqynynan zardap shekken ózge otbasylarǵa sekildi 10 jasar Mahabat Eshimovanyń otbasyna da barlyq qajetti áleýmettik kómek kórsetilip jatyr. Beinejoldaýǵa qala biligi jedel áreket etip, qazirgi tańda Mahabbat pen onyń anasy Turǵangúl Eshimova ýaqytsha turyp jatqan №40 mektepke baryp qaitty. Balanyń ótinish-aryzyn qala ákiminiń orynbasary Lázzat Orazbaeva tyńdady. Tasqynnan zardap shekken ózge otbasylardyń balalary sekildi bul oqýshy da mektepke qajetti barlyq qural-jabdyqtarmen jáne oqýlyqtarmen qamtamasyz etildi», - dep habarlady «Aqtóbe-aqparat» ortalyǵy.
