Tashkent qalasynyń Iakkasarai aýdandyq sotynyń sheshimimen quny birneshe million turatyn grafikalyq kartina zattai aiǵaq retinde tárkilendi.
2004 jyly qaitys bolǵan kollektsioner Nikolai Plýjnikovtyń 50 jastaǵy uly Andrei Plýjnikovtyń aitýynsha, ákesi qaitys bolardan úsh kún buryn oǵan kollektsiiasynda Rembrandt kartinasy saqtalǵanyn aitqan.
"Ákem meni shaqyryp alyp, úirek qaýyrsynymen salynǵan kartinany kórsetti. Ol maǵan: "Bul - eń qymbat kartina", - dedi. Ákemniń aitýynsha, bul kartinany ol 1945 jyly Berlinge shabýyl kezinde olja retinde alǵan. Kartina artyndaǵy jazbaǵa qaraǵanda, sýretti Germaniiaǵa 1945 jyly alyp kelgen. Mende Ózbekstan mádeniet ministrligi sarapshylarynyń kartina shyn máninde Rembrandtiki ekenin dáleldeitin qorytyndysy bar", - dedi Andrei Plýjnikov.
Andrei Plýjnikov kartina álemdik aýktsiondarda on eki million evro turatynyn bilgen soń, 2014 jyly óner týyndylaryn satýmen ainalysatyn Kamil Iýldashevqa portretti bergen. Sýretti Iýldashevke bergen ýaqytta Plýjnikov janynda tanymal restavrator Dilshod Azizov bolǵan.
"Kartinany alǵan Iýldashev sol kúii joǵalyp ketti. Men alaiaqtarǵa aldanyp qalǵanym týraly aryzdandym. Qylmystyq is qozǵaldy. Kartina biyl 14 maýsymda Tashkentten Izrailge ushqaly jatqan Rafael Fýzailovtyń bagajynan tabyldy. Kartina tárkilendi", – dedi Andrei Plýjnikov.
Bul is Ózbekstan Bas prokýratýrasynyń baqylaýyna alynǵan.
"Tergeý aiaqtaldy. Is sotqa berildi. Shyn máninde, Plýjnikov kartinany óz erkimen Iýldashevqa satqan. Ol alaiaqtyq jasamaǵan. Qazir sotta taraptardyń sózjarysy júrip jatyr. Kartinany kontrabanda retinde Ózbekstannan shyǵarǵysy kelgen. Sýret sot sheshimi shyqqansha ýaqytsha tárkilendi", – delingen Bas prokýratýra habarlamasynda.
