Tashkentte «Ózbekstannyń mádeni murasy – jańa Renessanstyń negizi» V Halyqaralyq kongresi aiasynda uly bileýshi jáne ǵalym Mirzo Ýlýgbektiń tapsyrysy boiynsha arnaiy jasalǵan kóne manýskriptiń faksimildi basylymy usynyldy, dep habarlaidy "QazAqparat" HAA.
«Qozǵalmaityn juldyzdar kitaby» astronomiialyq eńbegi - bul erekshe matematik, astronom jáne aǵartýshy ǵalym Mirzo Ýlýgbektiń buiryǵymen jasalǵandyǵy týraly sózsiz dálelderden turatyn erekshe qoljazba. Qoljazbanyń túpnusqalyǵy men tarihi qundylyǵy kúmán týdyrmaidy - onda Tsefei shoqjuldyzy túrindegi Mirzo Ýlýgbek beinelengen miniatiýra, altyn siiamen jazylǵan dóńgelek jazýlar jáne «taqtaǵy ǵalym» kitaphanasynyń basqa da belgileri bar.
Bul ejelgi qoljazbanyń faksimilesin aýstriialyq Mueller&Schindler baspasy Ózbekstannyń mádeni murasyn zertteý, saqtaý jáne nasihattaý jónindegi dúniejúzilik qoǵammen birlesip jasaǵan.
Eńbektiń avtory - Χ ǵasyrdyń ataqty astronomy jáne astrology Abd ar-Rahman ibn Omar as-Sýfi. Ortaǵasyrlyq astronomiiada «Qozǵalmaityn juldyzdar kitaby» shyn máninde dáýirlik jumysqa ainaldy jáne óziniń astronomiialyq kestelerin jasaý úshin jumys istegen ǵalym Ýlýgbekke kómek boldy. Bul qoljazba Mirzo Ýlýgbekke tiesili jáne onyń qolymen jasalǵan jazbalar bar. Qoljazbanyń túpnusqasy Frantsiianyń Ulttyq kitaphanasynda saqtaýly.
«Biz Frantsiianyń Ulttyq kitaphanasymen birinshi jyl birge jumys istep jatqan joqpyz, «Qozǵalmaityn juldyzdar kitaby» faksimilesi - bul bizdiń áriptestigimizdiń nátijesine ainalǵan ekinshi basylym. Faksimildi basylymdardyń qundylyǵy - túpnusqa qoljazbanyń qandai ekendigin júz paiyz kórsete alady», - dedi Ózbekstannyń mádeni murasyn zertteý, saqtaý jáne nasihattaý jónindegi dúniejúzilik qoǵamnyń basqarma tóraǵasy Firdavs Abdýhalikov.
