Qyrǵyzstan Tájikstannyń Aýǵanstanmen shekarasyna qaýip tónse, kómektesýge mindetti. Bul týraly beisenbi kúni Bishkektegi baspasóz máslihaty kezinde Qyrǵyzstan ulttyq qaýipsizdik jónindegi memlekettik komitet tóraǵasy Kamshybek Tashiev málimdedi. Keiingi aptalarda "Taliban" sodyrlary Ortalyq Aziia elderimen shekaradaǵy ondaǵan aýdandy basyp alǵan.
"Árine, Ujymdyq qaýipsizdik sharty uiymy aiasynda kez kelgen jaǵdaida ózara áreket etýge tiispiz. Aýǵanstan Ortalyq Aziianyń barlyq memleketi úshin qaýip tóndirip otyr" dedi jýrnalister suraqtaryna jaýap bergen Tashiev. Oǵan "Tájikstan UQShU-dan kómek surasa, Qyrǵyzstan Tájikstanǵa kómektese me?" degen suraq qoiylǵan edi.
Bir kún buryn Tájikstan Aýǵanstanmen shekarada qaýipsizdikti kúsheitý úshin UQShU elderinen kómek suraǵan bolatyn.
"Aimaqtaǵy jaǵdaidy eskersek, sonymen birge Aýǵanstanmen shekaradaǵy jekelegen aýmaqtyń taýly aýdanda shoǵyrlanǵanyn esepke alsaq, máseleni jeke sheshe almaimyz" degen edi Tájikstannyń UQShU-daǵy ókili Hasan Sýltonov. Onyń sózine qaraǵanda, keiingi eki aptada táliptermen soǵysta keri shegingen aýǵan úkimet kúshteriniń 1,5 myńǵa jýyq jaýyngeri tájik shekarasyn kesip ótken.
AQSh jáne NATO Aýǵanstannan áskerin shyǵara bastaǵan tusta tálipter shabýyldy kúsheitken. Batys elderiniń koalitsiiasy qyrkúiektiń ortasyna deiin áskerin tolyq áketýdi josparlap otyr.
Tájik biliginiń aitýynsha, qazir Aýǵanstanmen shekaradaǵy ortaq syzyqtyń úshten ekisi radikaldy dini topqa qaraidy. Onyń jalpy uzyndyǵy – 1350 shaqyrym.
Dýshanbe sonymen birge kórshi elden bosqyndar aǵylýy múmkin ekenin aityp, qazir alǵashqy kelgenderdi baspana-jai ján azyq-túlikpen qamtamasyz ete bastaǵanyn habarlady.
Qazir Aýǵanstanda soltústiktegi aýdandardyń edáýir bóligi tálipterge qaraidy. Radikaldy top halyqaralyq qaýymdastyq moiyndaǵan Kabýldaǵy úkimetti basyp alýy múmkin degen qaýip te aitylyp jatyr.
