Qazaqstannyń birinshi, álemniń 23-raketkasy Elena Rybakina óz mansabynda alǵash ret Ýimbldon týrniriniń finalyna shyqty, dep habarlaidy "Ult aqparat" QazAqparat agenttigine silteme jasap.
Otandasymyz jartylai finalda álemniń burynǵy birinshi raketkasy, «Úlken dýlyǵa» týrniriniń eki márte jeńimpazy (Frantsiia ashyq chempionaty – 2018, Ýimbldon – 2019), qazirgi kezde reitingide 18-satyda turǵan rýmyniialyq Simona Haleppen kezdesti.
Qarsylastar osyǵan deiin ózara úsh ret oinap, sonyń ekeýinde Halep jeńiske jetken edi.
Bul joly Rybakina birinshi partiiany qarqyndy bastap, 3:0 esebimen alǵa shyqty. Osy basymdylyǵynan aiyrylǵan joq – 6:3.
Elena ekinshi sette de 2:0 esebimen alǵa ketkenimen, Simona sol boida tarazy basyn teńestirip úlgerdi – 2:2. Degenmen, qazaqstandyq sportshy qaita breik jasap, óz geimin aldy – 4:2. Sodan keiin matchty taǵy bir breikpen támamdady – 6:3.
Bir saǵattan astam ýaqytqa sozylǵan báseke barysynda Elena 5 eis jasap, 9 breik-pointtyń tórteýin múlt jibermedi.
Osylaisha, Rybakina qazaqstandyq tennisshiler arasynan tuńǵysh ret Ýimbldon jarysynyń finalyna ótti. Bul – teńdessiz tabys.
Elena Rybakina Ulybritaniia ashyq chempionatynyń finalynda álemniń 2-raketkasy, týnistik Ons Jabermen bas júldeni sarapqa salady. O. Jaber jartylai finalda álemdik reitingide 103-orynda turǵan germaniialyq Tatiana Mariiany 6:2, 3:6, 6:1 esebimen tize búktirgen bolatyn.
