قازاقستاننىڭ بٸرٸنشٸ, ەلەمنٸڭ 23-راكەتكاسى ەلەنا رىباكينا ٶز مانسابىندا العاش رەت ۋيمبلدون تۋرنيرٸنٸڭ فينالىنا شىقتى, دەپ حابارلايدى "ۇلت اقپارات" قازاقپارات اگەنتتٸگٸنە سٸلتەمە جاساپ.
وتانداسىمىز جارتىلاي فينالدا ەلەمنٸڭ بۇرىنعى بٸرٸنشٸ راكەتكاسى, «ٷلكەن دۋلىعا» تۋرنيرٸنٸڭ ەكٸ مەرتە جەڭٸمپازى (فرانتسييا اشىق چەمپيوناتى – 2018, ۋيمبلدون – 2019), قازٸرگٸ كەزدە رەيتينگٸدە 18-ساتىدا تۇرعان رۋمىنييالىق سيمونا حالەپپەن كەزدەستٸ.
قارسىلاستار وسىعان دەيٸن ٶزارا ٷش رەت ويناپ, سونىڭ ەكەۋٸندە حالەپ جەڭٸسكە جەتكەن ەدٸ.
بۇل جولى رىباكينا بٸرٸنشٸ پارتييانى قارقىندى باستاپ, 3:0 ەسەبٸمەن العا شىقتى. وسى باسىمدىلىعىنان ايىرىلعان جوق – 6:3.
ەلەنا ەكٸنشٸ سەتتە دە 2:0 ەسەبٸمەن العا كەتكەنٸمەن, سيمونا سول بويدا تارازى باسىن تەڭەستٸرٸپ ٷلگەردٸ – 2:2. دەگەنمەن, قازاقستاندىق سپورتشى قايتا برەيك جاساپ, ٶز گەيمٸن الدى – 4:2. سودان كەيٸن ماتچتى تاعى بٸر برەيكپەن تەمامدادى – 6:3.
بٸر ساعاتتان استام ۋاقىتقا سوزىلعان بەسەكە بارىسىندا ەلەنا 5 ەيس جاساپ, 9 برەيك-پوينتتىڭ تٶرتەۋٸن مٷلت جٸبەرمەدٸ.
وسىلايشا, رىباكينا قازاقستاندىق تەننيسشٸلەر اراسىنان تۇڭعىش رەت ۋيمبلدون جارىسىنىڭ فينالىنا ٶتتٸ. بۇل – تەڭدەسسٸز تابىس.
ەلەنا رىباكينا ۇلىبريتانييا اشىق چەمپيوناتىنىڭ فينالىندا ەلەمنٸڭ 2-راكەتكاسى, تۋنيستٸك ونس جابەرمەن باس جٷلدەنٸ ساراپقا سالادى. و. جابەر جارتىلاي فينالدا ەلەمدٸك رەيتينگٸدە 103-ورىندا تۇرعان گەرمانييالىق تاتيانا مارييانى 6:2, 3:6, 6:1 ەسەبٸمەن تٸزە بٷكتٸرگەن بولاتىن.
