Foto: primeminister.kz
Tarifterdi retteý jumysyn durystap jasaý kerek. Bul týraly Premer-Ministr Álihan Smaiylov aitty, dep habarlaidy QazAqparat.
Búgin Úkimet otyrysynda Álihan Smaiylov infliatsiiany baqylaý jáne tómendetý jónindegi keshendi jospardy ózektendirý máselesi boiynsha baiandama jasaǵan Ulttyq ekonomika ministri Álibek Qýantyrovtan: «Infliatsiia qarsy jumystardyń tiimdiligi úilestirý jumysymen tikelei bailanysty. Ulttyq ekonomika ministrliginiń tarapynan qandai úilestirý jumystar bolady jáne osy jumysty qalai kúsheitesizder?» dep surady.
Ministr bul jumysty úilestirý úshin birneshe sheshim bar ekendigin atap ótti.
«Eń aldymen ortalyq jáne jergilikti organdardyń birinshi basshylarynyń orynbasarlary deńgeiinde tiisti jumys toby qurylady. Olar jedel máselelerdi pysyqtaý, keshendi jospardy monitoringileý jáne tiisti sheshimder qabyldaý úshin keminde eki aptada bir ret jinalady. Premer-Ministrdiń orynbasary deńgeiinde aiyna bir ret bas qosady. Sodan keiin osy monitoring boiynsha sizdiń deńgeiińizdi toqsanyna bir ret jinalý jáne tiisti tapsyrma berý usynysyn jasap otyrmyz», - dedi Álibek Qýantyrov.
Osy oraida Úkimet basshysy ministrge tarifterdi retteý jumysyn durystap júrgizý qajettigin eskertti.
«Tarifterdi retteý jumysyn durystap jasaý kerek. Qazir «Tarifterdiń ornyna investitsiia» baǵdarlamasy boiynsha tarifterdi qaita qaraý jumysy bastalady. Sonda jańa tarifterdiń úlesi tiisti bolýy qajet, infliatsiiany kóterip jibermeýi kerek. Sony sizder qadaǵalap otyrýlaryńyz qajet», - dedi Premer-Ministr.
