Taraz memlekettik pedagogikalyq institýtynyń ujymy «Bolashaqqa baǵdar: rýhani jańǵyrý» atty Elbasynyń maqalasyn talqylady. Alqaly jiynda oqý ornynyń professor-oqytýshylary men stýdentteri rýhani jańǵyrý ideiasynyń mán-mańyzyn sóz qyldy.
Bul týraly TarMPI-dyń aqparattyq-imidjdik qyzmetiniń jetekshisi Jandar Asan habarlady. Basqosýda institýttyń Tárbie jumysy jáne áleýmettik máseleler jónindegi prorektory Orynqyz Joldasova bul mazmuny tereń, ulttyq múddemizben sabaqtas qundylyqtardy jandandyrýǵa baǵyttalǵan súbeli eńbek ekendigin aitty.
– Memleket basshysy Nursultan Nazarbaevtyń «Bolashaqqa baǵdar: rýhani jańǵyrý» atty maqalasynda elimizdiń bolashaq damý baǵyty aiqyndaldy. Biz – birlik pen berekeni, turaqtylyq pen ózara kelisimdi nyǵaita otyryp, «Máńgilik el» ulttyq ideiasyn naqty júzege asyra bastadyq. Osy jolda Elbasy qoǵamnyń, árbir el azamatynyń sanasyn jańǵyrtýdyń naqty birneshe basym baǵyttaryn naqtylap berdi. Munymen qosa, Prezident maqalada memlekettiń básekege qabiletti bolýyn erekshe atap ótti. Álbette, kez kelgen ortada básekege qabiletti bolý – tabysty adamnyń formýlasy. Ol búgingi zamannyń talaby, – dedi O. Joldasova.
TarMPI-dyń Qazaqstan tarihy kafedrasynyń meńgerýshisi Áýezhan Shashaev maqalada rýhani salaǵa erekshe kóńil bólingendigin jáne bul memleket damýynyń úshinshi tuǵyry bolýy tiistigin áńgimeledi.
– Eń basty iaki negizgi máseleniń biri «Týǵan jer» baǵdarlamasynyń qolǵa alynatyndyǵy. Biz ósken óńirimizdi jaqsy kórip, týǵan jerimizdi maqtan etý arqyly Otanymyzǵa, memleketimizge degen súiispenshiligimiz arta túsedi. Sonymen qatar, maqaladaǵy basymdyqtardyń biri qazaqtyń salt-dástúrin, ulttyń mádeni kodyn halyqaralyq, gýmanitarlyq, ekonomikalyq protsesterge sáikestendirip, sol úderisterge ilestirip jiberý bolyp tabylady.
Sondai-aq, Elbasy Qazaqstanda latyn álipbiin qoldanysqa engizý máselesine de erekshe mán berý qajettigin alǵa tartty. Kún saiyn qarqyndy damyp jatqan zamanaýi tehnologiia, kommýnikatsiia jáne innovatsiianyń tehnikalyq tilin jedel meńgerýde latyn qarpiniń róli airyqsha mańyzdy bolmaq, – dep atap ótti Á. Shashaev.
Jiyn barysynda maqalada kórsetilgen «Ulttyq sana», «Týǵan jer» baǵdarlamasy, «Qazaq tilindegi 100 jańa oqýlyq», «100 jańa esim», «Mádeni-geografiialyq beldeý», «Básekelik qabilet», «Pragmatizm», «Ulttyq biregeilikti saqtaý», «Qazaqstannyń revoliýtsiialyq emes, evoliýtsiialyq damýy» jáne ózge de máseleler týrasynda keńinen áńgime qozǵalyp, qatysýshylar tarapynan qoldaýǵa ie boldy.
"Egemen Qazaqstan" gazeti
