Jambyl oblysynyń ákimi Berdibek Saparbaev mereke kúnderi qoǵamdyq kólik qozǵalysyn qysqartqan avtopark basshylaryna eskertý jasady, dep habarlaidy "Ult aqparat" oblys ákimdiginiń resmi saityna silteme jasap.
Qoǵamdyq kólik - Taraz qalasy turǵyndary úshin ózekti ári jii talqyǵa túsetin taqyryptardyń biri bolyp otyr. Áleýmettik jelide qalalyqtardan avtobýs marshrýttaryna qatysty kóp shaǵym túsýde. Ásirese, olar mereke kúnderi qoǵamdyq kólik qozǵalysynyń aitarlyqtai qysqartylǵanyn jetkizgen. Osy máselege airyqsha kóńil bólgen Jambyl oblysynyń ákimi Berdibek Saparbaev avtobýs parkterin aralap, olardyń jumysymen tanysty.
Naqtyraq aitsaq, aimaq basshysy aldymen oblys ortalyǵyndaǵy marshrýttardyń 40 paiyzyna qyzmet kórsetetin «ÁýlieAtaTransPass» JShS-de boldy. Kún saiyn seriktestikke tiesili 162 avtobýs 17 baǵyt boiynsha qatynaidy. Munda jyl saiyn jańa tehnikalar qatary tolyǵyp, GPS júiesi engizilgen desek te, turǵyndardyń kórsetilip otyrǵan qyzmet sapasyna kóńili tolmaidy.
- Sońǵy birneshe kún ishinde azamattardan shaǵymdar kóp túsýde. Avtobýstardyń óte sirek júrgeni mereke kúnderi turǵyndarǵa aitarlyqtai qiyndyq týǵyzǵan. Avtoparkter Taraz qalasy ákimdigimen jasalǵan shartqa qol qoiǵan. Ol sizderdi qoǵamdyq kólikti taza ustaýǵa, tasymal kestesin jáne halyqpen qarym-qatynas jasaý mádenietin barynsha saqtaýǵa mindetteidi. Búgingi tańda avtobýs parkiniń barlyq pýnktileri boiynsha narazylyq bar, - dedi Berdibek Saparbaev.
Oblys ákimi qala ákimdigine avtopark basshylyǵymen birlese kezdesip otyrǵan máselelerdi sheshýdi tapsyrdy. Sondai-aq, aimaq basshysy bul sekildi keleńsizdikter qaitalanatyn bolsa, tasymaldaýshy kompaniialarǵa eń qatań sharalar qabyldanatynyn atap ótti. Ol kezde eskertýmen shektelmeidi.
«Áýlieatranspass» JShS direktory Rashid Pirmanovtyń ujymmen túsindirý jumystary júrgizilgendigin jetkizip, bul kúnderi kiris jospary bekitilmeitinine sendirdi. Alaida, júrgizýshiler alynǵan túsim tipti janar jaǵarmai shyǵyndaryna da jetpeitinin aityp shaǵymdanýda. Osyǵan uqsas kórinis «SaparTrans 2012» JShS-nde de kezdesedi.
Tasymaldaýshylar endi qoǵamdyq kólik qozǵalysyn jolǵa qoiý jáne júrý kestesin buzbaýǵa ýáde berdi. Olardyń aitýynsha, avtobýstardyń tozýy ótkir máselege ainalǵan. Nashar joldardyń saldarynan qoldaǵy bar tehnikalar tez jaramsyz kúige túsýde. Qala ákimi Aitqazy Qarabalaev oblys ortalyǵynyń kóshelerin jóndeý jumystary kóp uzamai bastalatynyn tilge tiek etti.
- Taǵy bir ózekti másele - kásibi júrgizýshilerdiń jetispeýshiligi bolyp otyr. Bizge jumys isteýge kóp adamdar kele bermeidi, - deidi «SaparTrans 2012» JShS direktory Baýyrjan Ádilov.
Tasymaldaýshy-kompaniialar óz jumysynyń sapasyn jaqsartý úshin jergilikti bilikten tarifti kóterýdi nemese sýbsidiialaý arqyly qol ushyn berýdi surap otyr.
- Tarifti kóterý máselesi muqiiat qaraýdy talap etedi. Sebebi ol qala turǵyndary úshin, ásirese áleýmettik jaǵynan osal toptaǵy azamattar úshin ońai soqpasy anyq. Meniń oiymsha, qyzmet kórsetý sapasyn arttyrýǵa qol jetkizbei turyp, tarifti arttyrǵan durys emes. Onyń ústine mynadai qiyn ýaqytta oǵan jiti mán berý kerek, - dep jaýap berdi Berdibek Saparbaev.
Sondai-aq, avtobýs parkterin aralaý barysynda Berdibek Saparbaev qalalyq avtobýstardy dezinfektsiialaý sharalary qalai júrgizilip jatqanyn tekserdi. Tarazda koronavirýspen kúresý úshin sanitarlyq jumystarmen ainalysatyn tórt kompaniia bar. Bul rette qoǵamdyq kólik pen aialdamalar kúnine eki ret dezinfektsiialanýda.
