Foto: Videodan skrin
Tarazda kásipker mal ólekseleri tastalatyn qaýipti aýmaqty adam jerleitin qorymǵa ainaldyrǵan. Bul jaǵdai qoǵamda alańdaýshylyq týǵyzyp, mamandar men depýtattar dabyl qaǵýda. Bul týralyi KTK arnasy habarlady.
Málimetke sáikes, biotermiialyq qaldyqtar tógiletin aýmaqty jerleý rásimderimen ainalysatyn seriktestik ruqsatsyz paidalanyp kelgen. Eger jaǵdai osylai jalǵasa berse, ziiandy qaldyqtardan túrli qaýipti aýrýlardyń taraý qaýpi bar ekeni aitylýda.
Jambyl oblystyq máslihatynyń depýtaty Janar Búrkitbaeva bul jaǵdai sanitarlyq talaptarǵa múlde qaishy ekenin málimdedi. Onyń aitýynsha, zań boiynsha mundai nysandardan keminde bir shaqyrym sanitarlyq aimaq saqtalýy tiis. Alaida atalǵan jerde bul qashyqtyq 100 metrge de jetpeidi.
Veterinar mamandar da qaýiptiń joǵary ekenin eskertti. Biotermiialyq qaldyqtar joǵary temperatýrada qyzyp, keiin shiridi. Sondyqtan mundai aýmaqta mal jaiýǵa da, adamdardyń júrýine de tyiym salynǵan. Al qaldyqtardy tek arnaiy qorǵanys kiimi bar mamandar ǵana kómýi kerek.
Jambyl oblysy ákimdigi veterinariia basqarmasynyń ókili Talǵat Qojabergenov keiin salynǵan zirattar 2025 jyldyń sońynan bastap paida bolǵanyn aitty. Qazir bul iske kimniń jaýapty ekeni men jerdiń kimge tiesili ekeni anyqtalýda.
Al jerleý qyzmetimen ainalysatyn seriktestik basshysy Qadyrhan Abdýllaev bul aýmaqty turǵyndardyń suraýymen paidalanǵanyn aityp, qajetti ruqsattardy endi rásimdeýge kiriskenderin jetkizdi. Soǵan qaramastan, tiisti qujatsyz shamamen 30-ǵa jýyq adam jerlenip qoiǵan.
Qala ákimdigi máseleni tekserý úshin arnaiy jumys tobyn quratynyn málimdedi. Eger kásipkerdiń jerdi zańsyz paidalanǵany dáleldense, oǵan iri kólemde aiyppul salynýy múmkin.
Aita keteiik, buǵan deiin Shyǵys Qazaqstan oblysy aýmaǵynda qurylys alańynan adam súiekteri tabylyp, turǵyndar infektsiia taraý qaýpine alańdaǵan edi.
