Tarazda 35 jastaǵy er adamdy MRT apparaty tartyp óltirdi. Marqumnyń jaqyndary oqys oqiǵaǵa kinálilerdi anyqtap, jazaǵa tartý keregin málimdedi, - dep habarlaidy Tengrinews.kz tilshisi KTK telearnasyna silteme jasap.
Aqparat boiynsha, 35 jastaǵy jergilikti turǵyndy magnittik-rezonanstyq tomografiia apparaty jutyp qoiyp qaza tapqan. Atpaldai azamatty meditsinalyq quraldyń magniti ishke qarai tartyp áketip, ol sonyń aýzynda keptelip ajal qushqan.
"Ol bizdiń asyraýshymyz edi. Endi ne istedik?! Maǵan ulymdy qaitaryp bersin. Ol áli ómirdiń qyzyǵyn kórip úlgergen joq. Artynda kishkentai qyzy jetim qaldy. Jumys isteitin bólmeni ózderi bosatyp berýi kerek emes pe? Al ondaǵylar MRT-ny ornynan qozǵaltýdy osylarǵa júktegen", - dedi F. Hýsain-Ahýnovtyń anasy Vazira Hýsain-Ahýnova.
Qaiǵyly jaǵdai qaladaǵy meditsinalyq ortalyqtyń birinde bolǵan. Mekemede jóndeý jumystaryn júrgizip júrgen eki azamat MRT apparatyn ornynan jyljytpaq bolǵan. Sol kezde udaiy qosylyp turatyn meditsinalyq qondyrǵynyń qýatty magniti Fýrkat Hýsain-Ahýnovty ishine tartyp ketken.
Telearna tilshisiniń sózinshe, 35 jastaǵy er adam eki búktelip aýzynda keptelip qalypty. Birden esinen tanǵan jigitti alyp shyǵýǵa adamdardyń kúshi jetpei, keiin óli deneni júk kóligimen sýyryp alýǵa týra kelgen.
Marqumnyń jaqyndary oqys oqiǵaǵa kinálilerdi anyqtap, jazaǵa tartý kerek deidi. Al bolǵan jaǵdaiǵa túsinik beretin meditsinalyq ortalyqtan birde-bir ókil tabylmapty. Marqumnyń artynda áieli men tórt jasar qazy qaldy.
"Atalǵan derek boiynsha QK-tiń 156-baby, 3-bóligimen tergeý bastaldy. Qajetti sot-meditsinalyq saraptamalar taǵaiyndaldy", - dedi Jambyl oblysy PB baspasóz hatshysy Gúlsara Muhtarqulova.
