Foto: Jambyl oblysy ákimdigi
Keshe Jambyl oblysynyń ákimi Erbol Qarashókeev Taraz qalasyndaǵy «Qarasý» shaǵynaýdanyndaǵy shatyry órtengen №15 kópqabatty úidi aralap, turǵyndarynyń jaǵdaiymen tanystyb dep habarlaidy oblys ákimdiginiń baspasóz qyzmeti.
Aimaq basshysy órttiń shyǵý oshaǵyn, sebebin jáne shyǵyn kólemin anyqtaý úshin arnaiy komissiia qurylǵanyn habarlady.
– Turǵyn úige nysanaly tótenshe jaǵdai jariialandy. Ár páter boiynsha keltirilgen shyǵyn eseptelip, zań talaptaryna sáikes qalpyna keltirý jumystary júrgiziledi. Zardap shekken turǵyndarǵa qajetti kómek kórsetiledi, – dedi oblys ákimi.
Qazirgi tańda merdigerler shatyr jabyndylaryn alyp, qalpyna keltirý jumystaryn bastap ketti. Páterlerdi jóndeý tiisti komissiianyń naqtylaý, anyqtaý sharalarynan keiin júzege asady.
Oblys ákimi zerdeleý kommisiianyń jumysyna turǵyndardy da tartý qajettigin basa aityp, qala basshylyǵyna naqty tapsyrmalar júktedi. Sondai-aq, turǵyndardy sabyrlyq tanytýǵa, saqtyq sharalaryn qatań saqtaýǵa shaqyrdy.
Eske sala keteiik, 2025 jylǵy 31 jeltoqsanda saǵat 22:18-de atalǵan turǵyn úidiń balkonynan órt shyǵyp, jalyn shatyrǵa taraǵan.
Tótenshe jaǵdailar departamentiniń kúshimen 100 adam, onyń ishinde 30 bala evakýatsiialandy. Saǵat 00:13-te órt tolyq sóndirildi. Zardap shekkender joq.
Oqiǵa ornyna 62 adam jáne 22 tehnika jumyldyryldy. Kópqabatty turǵyn úidiń birqatar turǵyndary qonaqúige ornalastyryldy.
Aimaq basshysynyń tapsyrmasyna sáikes oqiǵa ornynda oblys ákiminiń orynbasary Altai Áli men Taraz qalasynyń ákimi Baqytjan Orynbekov jumys júrgizip jatyr.
Aita keteiik, Tarazda Jańa jyl túninde eki iri órt boldy.
