Tarazda kúshti jelden keiin qala turǵyndary sýsyz jáne elektr jaryǵynsyz qaldy. Kommýnaldyq qyzmetter daýyldyń saldaryn joiý úshin kúsheitilgen rejimde jumys istep jatyr, dep habarlaidy QazAqparat.
7 sáýirde qalada sekýndyna 1520 metr jyldamdyqpen jel soqty. Kei jerlerde jel qarqyny 25 m/s deiin jetti.
Oblys ortalyǵynyń basym bóligi jaryqsyz qaldy, baǵdarshamdar jumys istemedi.
Elektr qýaty óshirilgen soń nasos stansalarynyń jumysy toqtap, qalanyń bir bóligine aýyz sý berilmei qaldy.
- Birneshe turǵyn aǵash qulaýy qateri jaily habar keldi. Degenmen «Jasyl el Taraz» mamandary oqiǵa ornyna baryp, tekserý júrgizgenimen qulaǵan aǵashtar tirkelgen joq. Shatyr ushqany týraly shaǵymdar bolǵan joq, soǵan qaramastan ákimdik qyzmetkerleri ǵimarattardy tekserip jatyr. Bilim jáne densaýlyq saqtaý nysandaryna qaýip tóngen joq» dep málim etti qalalyq media ortalyq.
Tarazǵa jaqyn mańdaǵy Jambyl aýdanynda Jambyl GRES-ine qarasty №157 jáne 158 stansalarynda apat jaǵdaiy qalyptasqany belgili boldy. Osy sebepten birqatar kóshelerde jáne mekemelerde jaryq sóndirilgen.
Búginde №157 stansada apat saldary joiylyp, jumys tolyq qalpyna keldi. №158 stansada alty brigada jumys istep jatyr.
Jaryq berilgennen keiin sýmen qamtý qyzmeti de ishinara iske qosyldy.
Oblys ákimdiginiń 109 arnaiy qyzmetine 72 shaǵym kelip tústi, onyń 71-i qala móltekaýdandarynda elektr qýatynyń óshýine qatysty boldy.
Aryzdanǵan turǵyndardyń ishinde 32 mekenjai boiynsha jaryq berildi.
