Taratylatyn segiz banktegi depozitter BJZQ-ǵa 31 mamyrǵa deiin aýdarylady, dep habarlaidy QazAqparat «Qazaqstannyń depozitterge kepildik berý qory» AQ-nyń baspasóz qyzmetine silteme jasap.
Baspasóz qyzmetiniń málimetterine qaraǵanda, qazaqstandyqtar áli kúnge deiin ózderiniń 2,3 mlrd teńge jinaq aqshalaryn talap etýge asyǵar emes. Búginde bul qarajatty úiden shyqpai-aq, onlain túrinde nemese agent bankterdiń bólimshelerine baryp alýǵa bolady.
Qazaqstannyń depozitterge kepildik berý qorynyń (Qor) basshylyǵy litsenziiasynan aiyrylǵan bankterdegi salymdar boiynsha kepildik berilgen ótemdi qalai jáne qai merzimge deiin alýǵa bolatyndyǵyn aityp berdi.
Qor Tóraǵasy Ádil Ótembaev qazirgi ýaqytta elimizde 9 bankte taratý úderisi júrgizilip jatqandyǵyn, olardyń salymshylaryna ótem somasynyń 98%-dan astamy tólenip qoiylǵandyǵyn, al munyń 113,1 mlrd astam teńge bolatyndyǵyn jetkizdi.
«Taratylatyn segiz bankten tólemderdi sońǵy kúnin qosa alǵanda biylǵy jyldyń 1 mamyryna deiin alýǵa bolady. Al «Capital Bank Kazakhstan» AQ basqa bankterge qaraǵanda litsenziiasynan keiinirek aiyrylǵandyqtan onyń salymshylary úshin sońǵy tólem kúni – sońǵy kúnin qosa alǵanda 2022 jyldyń 3 shildesi», - dedi Ádil Ótembaev.
Kepildik berilgen ótemdi alýǵa ótinishti Tólemderdiń elektrondyq portaly (TEP)arqyly onlain túrinde berýge bolady. Munda ótinishtiń oryndalý barysyn qadaǵalaýǵa múmkindik bar. Salymshylar taratylatyn árbir bank boiynsha ótem tóleýge taǵaiyndalǵan agent bankterdiń bólimshelerine jazbasha ótinishpen júgine alady.
Tólem merzimi aiaqtalǵan soń, «Qazinvestbank» AQ, «Delta Bank» AQ, «Qazaq Banki», «Eksimbank Qazaqctan» AQ, «Astana Banki» AQ, «Tengri Bank» AQ, «AsiaCredit Bank (AziiaKredit Bank)» AQ jáne «Capital Bank Kazakhstan» AQ salymshylarynyń talap etpegen ótem somalary olardyń erikti zeinetaqy jarnalaryn (EZJ) esepke alýǵa arnalǵan jeke zeinetaqy shottaryna aýdarylady.
Qor aýdarymdy «Qazaqstan Respýblikasynyń ekinshi deńgeidegi bankterinde ornalastyrylǵan depozitterge mindetti kepildik berý týraly» QR Zańyna sáikes tólem merzimi aiaqtalǵan kúnnen bastap, kúntizbelik 30 kún ishinde júzege asyrady. Demek taratylatyn segiz banktiń salymshylarynyń aqshalary BJZQ-ǵa 31 mamyrǵa deiin, al «Capital Bank Kazakhstan» AQ boiynsha aǵymdaǵy jyldyń 2 tamyzyna deiin aýdarylady.
BJZQ mamandary óz kezeginde aqshany jeke zeinetaqy shotyna aýdarý úshin salymshynyń zeinetaqy qoryna barýy mindetti emestigin jetkizdi.
Salymshy týraly málimet BJZQ-nyń aqparattyq resýrsyndaǵy derektermen sáikes kelip, onyń qoldanystaǵy jeke kýáligi bar bolǵan jaǵdaida kepildik somasy aýdarylady. Budan basqa salymshynyń zeinetaqy jinaqtary bolýy shart: jinaqtar mindetti zeinetaqy jarnalary jáne (nemese) mindetti kásiptik zeinetaqy jarnalary jáne (nemese) EZJ esebinen bolýy múmkin.
Tólem merzimin dáleldi sebeptermen (áskeri qyzmetke ornalasý, depozitordyń shetelde, bas bostandyǵynan aiyrý oryndarynda bolýy, mura qabyldaýy jáne sot anyqtaǵan ózge de mán-jailar) ótkizip alǵan salymshy jazbasha ótinishpen jáne rastaýshy qujattarmen tikelei Qorǵa júginedi.
Tolyq aqparatty salymshylar 1460 telefon nómiri, sondai-aq Qordyń info@kdif.kz, kdif@kdif.kz elektrondyq poshtalaryna saýal jiberý nemese @kdif_ask Telegram-chatyna suraq qoiý arqyly alýǵa bolady.
