Almaty oblysynda qylmystyq top tapanshamen jáne pyshaqpen turǵyndarǵa shabýyl jasap, tonap kelgen. Kúdiktiler Almaty qalasynda ustaldy, dep habarlaidy QazAqparat.
«6-9 qarasha aralyǵynda Qarasai aýdandyq politsiiasynyń kezekshi bólimine jergilikti turǵyndar qarýly shabýylǵa tap bolǵany týraly shaǵym túsirdi. Tirkelgen 3 epizodta da tapansha men pyshaq ustaǵan, betine meditsinalyq maska kiip, basyn kapiýshonmen búrkemelegen 3 jigit kózge túsken.
Kúdiktiler túnde jalǵyz júrgen adamdardy qarýmen qorqytý arqyly quny 330 myńnan 840 myń teńgege deiin jetetin uialy telefondardy tartyp alyp otyrǵan. Is bitken soń kúdiktiler kúmis tústi Hyundai Elantra kóligine otyryp, iz jasyrǵan.
Atalǵan fakti QR Qylmystyq kodeksiniń «Toptyq qarýly qaraqshylyq» baby boiynsha tirkeldi», - dep jazylǵan Polisia.kz málimetinde.
Jedel-izdestirý jumystaryn júrgizgen saqshylar kúdiktilerdi Almaty qalasynan ustaǵan.
«Buǵan deiin olardyń tonaý, qaraqshylyq, densaýlyqqa aýyr ziian keltirý jáne urlyq siiaqty qylmys jasaǵany úshin sottalǵany anyqtaldy. Kúdiktilerden pyshaq, tapansha jáne urlanǵan úsh telefonnyń ekeýi tárkilendi. Al olardyń astyndaǵy kólik jalǵa alynǵan bolyp shyqty. Tergeý soty 3 aiyptalýshynyń da buryn sottalǵanyn eskerip, sotqa deiingi tergeý kezinde qamaýda ustaý túrindegi bultartpaý sharasyn taǵaiyndady», - dep jazylǵan saitta.
