Belgili jýrnalist Beisen Quranbek 49 jasqa qaraǵan shaǵynda dúnieden ótti. Bul týraly Almaty oblysy ákiminiń baspasóz hatshysy Ǵalymurat Júkel habarlady.
Beisen Quranbektiń densaýlyǵy syr berip, biraz ýaqyttan beri asqazanyn emdetip jatqany týraly aitylyp júrgen bolatyn.
Uzaq ýaqyt emdelgen azamatty aqtyq saparǵa erteń 19 mamyrda oblystyq deńgeide shyǵaryp salady.
Áleýmettik jelidegi paraqshasynda qaldyrǵan sońǵy jazbasynda ol úsh nárseni tereń túsingenin jetkizgen.
"Jyl basynan bergi ishki arpalysqa toly kúnderimde, uiqysyz túnderimde úsh nárseni tereńirek túsindim... Birinshi, ustazym jii aitatyn "bul ómirde aqshadan da, bilikten de qudiretti dúnie bar. Ol- niettiń, tilektiń, batanyń kúshi" degen sózdiń ras ekenin. Ekinshi, halqymyzdyń "basty bailyq - densaýlyq" dep bir aýyz sózben aita salǵan danalyǵyna bas idim. Uiqy tynysh, tábetiń jaqsy bop, erteńgisin esh jeriń aýyrmai oianýdyń ózi jarty baqyt ekenin uqtym", - dep jazdy ol.
Úshinshiden, babalarymyz qaldyrǵan "Bailyq - qolǵa ustaǵan muz, baqyt - basqa qonǵan qus, bala - artta qalar iz, bul ómirdiń qyzyǵy - Siz ben Biz" degen sóziniń tutas ómirlik filosofiia ekenin, ómirdiń máni de, sáni de syilastyqta ekenin sezingenin aitty.
"Bir-birimizdiń tileýimizdi tilep, densaýlyqtyń qadirin bilip, bir-birimizdi shyn kóńilmen qurmettei bileiikshi degim keledi. Bar bolyńyzdar!", - dep jazdy jýrnalist.
Ol eńbek jolyn respýblikalyq «Sport» gazetinde tilshi, jaýapty hatshy qyzmetinen bastaǵan.
Al qalǵan ǵumyryn qazaq televideniesimen bailanystyryp, «Rahat», «31 arna», «Habar» arnalarynda, Prezident teleradiokesheninde qyzmet atqarǵan.
2007-2012 jyldary Almaty oblystyq «Jetisý» telearnasynyń bas direktory boldy.
2013-17 jyldary «Qazaqstan» telearnasyndaǵy jalpaq jurtqa tanymal «Aitýǵa ońai» áleýmettik-turmystyq tok-shoýynyń júrgizýshisi boldy.
2017 jyldyń qyrkúiek aiynan beri ulttyq arnadaǵy «Qareket» baǵdarlamasyn júrgizdi.
2014 jyldyń qazan aiynda Almaty oblystyq «Jetisý» telearnasynyń bas direktory bolyp qaita taǵaiyndaldy.
Beisen Quranbek kisilik kelbeti, adamgershilik qasietimen ainalasyna qadirli bola bildi. Ol BAQ salasyndaǵy eń joǵary marapat - Qazaqstan Respýblikasy Prezidenti syilyǵynyń laýreaty da atandy. Izin jalǵan ini-qaryndastaryna qamqor aǵa, qyzmette - bilikti maman, áriptesterine syily azamat edi.
Onyń jarqyn beinesi el júreginde máńgilik saqtalmaq.
Ult portalynyń ujymy marqumnyń otbasy men týǵan-týysynyń, áriptesteriniń aýyr qaiǵysyna ortaqtasyp, kóńil aitady.
Arystai azamattyń jatqan jeri jaryq, topyraǵy torqa bop, rýhy peiishtiń tórinde shalqysyn!
