بەلگٸلٸ جۋرناليست بەيسەن قۇرانبەك 49 جاسقا قاراعان شاعىندا دٷنيەدەن ٶتتٸ. بۇل تۋرالى الماتى وبلىسى ەكٸمٸنٸڭ باسپاسٶز حاتشىسى عالىمۇرات جٷكەل حابارلادى.
بەيسەن قۇرانبەكتٸڭ دەنساۋلىعى سىر بەرٸپ, بٸراز ۋاقىتتان بەرٸ اسقازانىن ەمدەتٸپ جاتقانى تۋرالى ايتىلىپ جٷرگەن بولاتىن.
ۇزاق ۋاقىت ەمدەلگەن ازاماتتى اقتىق ساپارعا ەرتەڭ 19 مامىردا وبلىستىق دەڭگەيدە شىعارىپ سالادى.
ەلەۋمەتتٸك جەلٸدەگٸ پاراقشاسىندا قالدىرعان سوڭعى جازباسىندا ول ٷش نەرسەنٸ تەرەڭ تٷسٸنگەنٸن جەتكٸزگەن.
"جىل باسىنان بەرگٸ ٸشكٸ ارپالىسقا تولى كٷندەرٸمدە, ۇيقىسىز تٷندەرٸمدە ٷش نەرسەنٸ تەرەڭٸرەك تٷسٸندٸم... بٸرٸنشٸ, ۇستازىم جيٸ ايتاتىن "بۇل ٶمٸردە اقشادان دا, بيلٸكتەن دە قۇدٸرەتتٸ دٷنيە بار. ول- نيەتتٸڭ, تٸلەكتٸڭ, باتانىڭ كٷشٸ" دەگەن سٶزدٸڭ راس ەكەنٸن. ەكٸنشٸ, حالقىمىزدىڭ "باستى بايلىق - دەنساۋلىق" دەپ بٸر اۋىز سٶزبەن ايتا سالعان دانالىعىنا باس يدٸم. ۇيقى تىنىش, تەبەتٸڭ جاقسى بوپ, ەرتەڭگٸسٸن ەش جەرٸڭ اۋىرماي ويانۋدىڭ ٶزٸ جارتى باقىت ەكەنٸن ۇقتىم", - دەپ جازدى ول.
ٷشٸنشٸدەن, بابالارىمىز قالدىرعان "بايلىق - قولعا ۇستاعان مۇز, باقىت - باسقا قونعان قۇس, بالا - ارتتا قالار ٸز, بۇل ٶمٸردٸڭ قىزىعى - سٸز بەن بٸز" دەگەن سٶزٸنٸڭ تۇتاس ٶمٸرلٸك فيلوسوفييا ەكەنٸن, ٶمٸردٸڭ مەنٸ دە, سەنٸ دە سىيلاستىقتا ەكەنٸن سەزٸنگەنٸن ايتتى.
"بٸر-بٸرٸمٸزدٸڭ تٸلەۋٸمٸزدٸ تٸلەپ, دەنساۋلىقتىڭ قادٸرٸن بٸلٸپ, بٸر-بٸرٸمٸزدٸ شىن كٶڭٸلمەن قۇرمەتتەي بٸلەيٸكشٸ دەگٸم كەلەدٸ. بار بولىڭىزدار!", - دەپ جازدى جۋرناليست.
ول ەڭبەك جولىن رەسپۋبليكالىق «سپورت» گازەتٸندە تٸلشٸ, جاۋاپتى حاتشى قىزمەتٸنەن باستاعان.
ال قالعان عۇمىرىن قازاق تەلەۆيدەنيەسٸمەن بايلانىستىرىپ, «راحات», «31 ارنا», «حابار» ارنالارىندا, پرەزيدەنت تەلەراديوكەشەنٸندە قىزمەت اتقارعان.
2007-2012 جىلدارى الماتى وبلىستىق «جەتٸسۋ» تەلەارناسىنىڭ باس ديرەكتورى بولدى.
2013-17 جىلدارى «قازاقستان» تەلەارناسىنداعى جالپاق جۇرتقا تانىمال «ايتۋعا وڭاي» ەلەۋمەتتٸك-تۇرمىستىق توك-شوۋىنىڭ جٷرگٸزۋشٸسٸ بولدى.
2017 جىلدىڭ قىركٷيەك ايىنان بەرٸ ۇلتتىق ارناداعى «قارەكەت» باعدارلاماسىن جٷرگٸزدٸ.
2014 جىلدىڭ قازان ايىندا الماتى وبلىستىق «جەتٸسۋ» تەلەارناسىنىڭ باس ديرەكتورى بولىپ قايتا تاعايىندالدى.
بەيسەن قۇرانبەك كٸسٸلٸك كەلبەتٸ, ادامگەرشٸلٸك قاسيەتٸمەن اينالاسىنا قادٸرلٸ بولا بٸلدٸ. ول باق سالاسىنداعى ەڭ جوعارى ماراپات - قازاقستان رەسپۋبليكاسى پرەزيدەنتٸ سىيلىعىنىڭ لاۋرەاتى دا اتاندى. ٸزٸن جالعان ٸنٸ-قارىنداستارىنا قامقور اعا, قىزمەتتە - بٸلٸكتٸ مامان, ەرٸپتەستەرٸنە سىيلى ازامات ەدٸ.
ونىڭ جارقىن بەينەسٸ ەل جٷرەگٸندە مەڭگٸلٸك ساقتالماق.
ۇلت پورتالىنىڭ ۇجىمى مارقۇمنىڭ وتباسى مەن تۋعان-تۋىسىنىڭ, ەرٸپتەستەرٸنٸڭ اۋىر قايعىسىنا ورتاقتاسىپ, كٶڭٸل ايتادى.
ارىستاي ازاماتتىڭ جاتقان جەرٸ جارىق, توپىراعى تورقا بوپ, رۋحى پەيٸشتٸڭ تٶرٸندە شالقىسىن!
