Elimizge tanymal tulǵalar jáne sheteldik elshilik qyzmetkerleri ata-ana qamqorlyǵynan aiyrylǵan sábilerdiń tusaýyn kesti, dep habarlaidy QazAqparat tilshisi.
QR Ulttyq mýzeiiniń bastamasymen qolǵa alynǵan «Tusaýkeser» qairymdylyq jobasy biyl tórtinshi ret uiymdastyrylyp otyr.
«Elbasy Nursultan Nazarbaev óziniń «Bolashaqqa baǵdar: Rýhani jańǵyrý» baǵdarlamasynda tarihymyz ben salt-dástúrimizdi saqtap qana qoimai, dúnie júzine keńinen nasihattaýymyz kerektigin erekshe atap ótti. Naýryz - bizdiń tól merekemiz. Bul aitýly merekeni jańa úlgide toilaý týraly usynys bildirgen bolatynmyn, onda búldirshinderge basa nazar aýdarylsa dedik. Sol sebepti tusaýkeser rásimi uiymdastyrylyp otyr. Sonymen birge, búgingi sharaǵa balalar úiinen jáne áleýmettik jaǵdaiy tómen otbasy balalary arnaiy shaqyryldy, olarǵa syi-siiapat berip, kóńilderin kótergimiz keledi», - dedi QR Mádeniet jáne sport ministri Arystanbek Muhamediuly «Naýryz - jańarý nyshany» shoý-baǵdarlamasynyń saltanatty ashylýynda.
Tusaýkeser rásimine №2 mamandandyrylǵan balalar úiinen Ramazan Nurhatov, Aidyn Bekishev, Injý Bekisheva, Maksim Tretiakov, Arystan Begali, Áljan Abdýov, Álibek Jamanqulov arnaiy keldi.
Olardyń tusaýyn QR Mádeniet jáne sport ministri Arystanbek Muhamediuly men Qazaqstandaǵy EO ókildiginiń basshysy Sven-Olov Karlsson, QR Ulttyq mýzeii direktorynyń mindetin atqarýshy Almaz Nurazhan, «Qasietti Qazaqstan» ǵylymi zertteý ortalyǵynyń basshysy Berik Ábdiǵali, Tarih ǵylymdarynyń doktory, professor Jambyl Artyqbaev, satirik Kópen Ámirbek, Qazaqstannyń eńbek sińirgen qairatkeri, dástúrli ánshi Aigúl Qosanova jáne shet memleketterdiń Qazaqstandaǵy elshilik ókilderi kesti.
«Tusaýkeser rásimi úshin jyl saiyn Naýryz merekesinde Ulttyq mýzeige kelemiz. Biyl tórtinshi ret balalarymyzdyń tusaýy kesilip, jaqsy tilekter aitylyp jatyr. Kóp jaǵdaida tusaýy kesilgen balalar jańa otbasylaryn tabady. Sol úshin Ulttyq mýzeidegi uiymdastyrýshylarǵa alǵysymyz sheksiz», - dedi №2 mamandandyrylǵan balalar úiiniń tárbieshisi, psiholog Gúljan Tólesova.
Tusaýkeserden soń, kontserttik baǵdarlama jalǵasyn taýyp, teatrlandyrylǵan qoiylym, aitys óneri, án, bi, arqan tartys, kiiz basý jáne qolóner boiynsha sheberlik sabaqtary ótti.
Aita keteiik, 21 naýryz kúni ulttyq kiim kigender mýzeige tegin kiredi. Bul úshin áleýmettik jelidegi (feisbýk - QR Ulttyq mýzeii, instagram - Nationalmuseumkz, telegramm - QR Ulttyq mýzeii) Ulttyq mýzei paraqshalaryna tirkelip, #Ulttyqmýzei heshtegin belgileý qajet.
