Qazaqstandyq tanymal akter Farhat Ábdiraiymov 55 jasynda qaitys boldy. Qaraly habardy «Qazaqfilm» kinostýdiiasy rastady.
«Ókinishke orai ras aqparat. Ol Grýziiada túsirilimde bolǵan edi. Ólim sebebi – infarkt», - dep habarlady «Qazaqfilm».
Al, Qazaqstan mádeniet ministrliginiń baspasóz qyzmeti ártistiń Grýziiada "Bolshe, chem liýbov" filminiń túsirilimi kezinde qaitys bolǵanyn aitty.
Akterdi aqtyq saparǵa shyǵaratyn kún men oryn qosymsha habarlanbaq.
Farhat Ábdiraiymov 1966 jyly 21 qańtarda Almaty qalasynda týǵan. Almaty tehnologiialyq ýniversitetin bitirgen.
Onyń kinodaǵy debiýti 1996 jyly Qazaqstan men Resei birlesip túsirgen "Kimniń jany názik bolsa" filmindegi róli boldy. Osy róli úshin ol "1996 jyldyń úzdik akteri" retinde Reseidiń kino basylymynyń syilyǵyn aldy.
1999 jyly Ábdiraiymov "Fara" filminde basty róldi somdap, Halyqaralyq Máskeý kinofestivalinde úzdik er adam róli júldesine ie boldy.
1999 jyldan Sh.Aimanov atyndaǵy «Qazaqfilm» AQ-nyń akteri.
2000 jyly "Altyn adam" baiqaýynda ártis "Jyl kinojuldyzy" atandy. XXI Halyqaralyq «Sviatoi Georgii Pobedonosets» kinofestivaliniń Gran-pri júldesin jeńip alǵan.
2003 jyly Qazaqstan prezidentiniń qurmet gramotasymen marapattalǵan ol Qazaqstan kinematografister odaǵynyń múshesi boldy.
«Shanhai», «Aqsýat», «Ompa», «Mahabbat tálkegi», «Siqyrshy demeýshi», «Jel adam», «Frantsýz qurbaqasynan ázirlengen borsh», «Shekara», «Jan júregim - Astana», «Parallel álem», «Geizer», «Úsh limon», «Batyr», «Eń sulý» syndy filmderge túsken.
