QR Indýstriia jáne infraqurylymdyq damý ministri Qaiyrbek Óskenbaev «MFA International» JShS men «ATM Construction & Investment» JShS zaýyttarynyń qurylysymen tanysty, dep habarlaidy QazAqparat ministrliktiń baspasóz qyzmetine silteme jasap.
Vedomstvo basshysy birinshi aialdaǵan «MFA International» JShS zaýyty meditsinalyq betperdeler men aýa tazartatyn respiratorlar óndiredi. «Astana – jańa qala» AEA indýstriialyq parki aýmaǵynda ornalasqan túrkiialyq kásiporynnyń qurylysy biyl tamyz aiynda tolyǵymen aiaqtalmaq.
Jobanyń alǵashqy kezeńinde Z-267 seriialy qorǵanysh deńgeii joǵary betperde shyǵarý kózdelse (jylyna 2,5 mln dana betperde), kásiporyn tolyq iske qosylǵanda Prestij (P-267V) seriialy meditsinalyq maska óndirý josparlanǵan (jylyna 10 mln dana betperde). Jobanyń jalpy quny – 2,1 mlrd teńge.
Al tereze, meditsinalyq qural-jabdyqtar, keńse jihazdary men metall buiymdaryn óndiretin «ATM Construction & Investment» JShS zaýyty 2022 jyldyń qyrkúiek aiynda iske qosylmaq. Kásiporyn «Astana – jańa qala» arnaiy ekonomikalyq aimaǵynda ornalasqan. Jalpy quny 22 mlrd teńgeni quraityn zaýyt tolyq iske qosylǵanda 500 jańa jumys orny paida bolady dep kútilýde. Joba jalpy aýmaǵy 17 myń sharshy metr aýmaqtaǵy bes negizgi óndiristik keshennen turady.
«QR IIDM basshysy investorlarmen jáne qurylysqa jaýapty tulǵalarmen kezdesip, kásiporyndardyń halyq igiligine qyzmet etetinine senim bildirdi», delingen QR Indýstriia jáne infraqurylymdyq damý ministrliginiń baspasóz qyzmeti taratqan aqparatta.
