Ońtústik Qazaqstan oblysyna jasaǵan sapary barysynda QR Eńbek jáne halyqty áleýmettik qoldaý ministri Tamara Dúisenova keler jyldan bastap áleýmettik salada engiziletin úlken reformalarǵa óńirdiń daiyndyǵyn pysyqtady.
Oblys ákimdiginde jinalǵan qala-aýdan ákimderi men tiisti sala basshylary qatysqan jiynda ministr óz isine sylbyrlyq tanytyp otyrǵan sheneýnikterdi saýaldyń astyna aldy, dep habarlaidy QazAqparat tilshisi.
Máselen, keler jyly 1- qańtardan bastap engiziletin meditsinalyq saqtandyrý qory boiynsha azamattardyń tizimi jasalyp, olardyń qorǵa tóleý múmkindigi esepke alynýda. Ózge óńirlerde jumys istep júrgen ońtústikqazaqstandyqtar da, tipti qaitys bolyp, tiisti anyqtamamen tirkelmegender jaiynda da maǵlumattar jinalyp jatyr. Talap boiynsha osy jyldyń birinshi shildesine deiin tiisti tizim ministrlikke joldanýy tiis bolsa, keibir aýdan ákimdikteri talaptyń údesinen shyǵa almaýda. Bul rette Tamara Qasymqyzy belgilengen merzimde tizim jasalyp, naqtylanbasa jyl bastalǵanda azamattar arasynda túsinispeýshilik týyndaitynyn atap ótti. Mysaly óńirde jumysqa qabiletti 424 myń adamnyń basym bóligi ózin-ózi nátijeli jumyspen qamtyǵan. Olarǵa endi salyq inspektsiiasyna tirkelý kerektigin eskertý kerek.
«Oblysta 424 myń adam ózin-ózi jumyspen qamtyǵan dep otyr ǵoi. Olardyń ishinde kópshiligi sharýa qojalyqtarynda jumys isteitin azamattar. Nemese bazarda turyp patent almaǵan, tirekeýge turmastan jolaýshy tasymaldaýmen ainalysatyndar. Ol azamattarǵa aitýymyz kerek, «sizder salyq inspektsiiasyna tirkelip, patent alsańyzdar ai saiyn 1 414 teńge tóleisizder. Eger 2018 jyldyń qańtar aiyna deiin úlgermese ózin-ózi nátijeli jumyspen qamtyǵan azamattar 2020 jylǵa deiin emhana kómegin memleket tarapynan tegin alady. Josparly statsionarlyq kómekti óz qarajatyna alady», dep túsindirýimiz kerek. Jalpy biz oblys qala, aýdan ákimdikterin meditsinalyq saqtandyrý máselesine óte kóp kóńil bólýin aityp jatyrmyz. Sondai-aq bul baǵytta jer-jerdegi jumyspen qamtý ortalyqtarynyń jumysyn kúsheitý kerektigin aittyq», - dedi ministr Dúisenova.
Ministrdiń sózinshe mindetti áleýmettik meditsinalyq saqtandyrý júiesine engen bir million teńge jalaqysy bar azamat pen 40 myń teńge jalaqy alatyn azamatqa birdei meditsinalyq kómek kórsetiledi. Qordyń ortaq bolý júiesi dúniejúzindegi tájiribeden alynǵan.
«Ortalyqtandyrylǵan meditsinalyq qor deimiz. Kim aýyryp qaldy soǵan tolyq meditsinalyq kómek beriledi. Mysaly, bir azamattyń eńbekaqysy 60 myń teńge. Qarajaty óte az jinalǵan. Biraq oǵan kardiohirýrgiialyq ota jasaý kerek. Ol 10 million teńge turady. Óz qarajatyna jasata almaidy. Basqa azamattardan túsken qarajatty paidalanyp tolyq meditsinalyq kómek beriledi. Million teńge jalaqysy bar azamat meditsinalyq kómekti tolyq alyp, 40 myń teńge jalaqysy bar adam meditsinalyq kómek ala almaýy múmkin. Meditsinalyq saqtandyrý júiesiniń eń negizgi printsipi - bir jerge bir qorǵa jinap, kimge qandai kómek kerek sony ýaqytyly kórsetý», - deidi Tamara Dúisenova.
Jiynda kóterilgen ekinshi másele, zeinetaqyny kezeń-kezeńimen kóbeitý men zeinetaqy jasyn arttyrý boldy. Tamara Qasymqyzynyń sózinshe qazir zeinet jasyna jaqyndaǵan azamattardy jumyspen qamtýǵa memeleketten qarajattar qarastyrylǵan. Sol jeńildikterdi qazir jasy alpysqa taiaǵan azamattardyń jumyspen qamtamasyz etilýine kúsh salý kerek. Bul rette Tamara Dúisenova barlyq atqarýshy bilik ókilderi men sala mamandaryna jumysty shiratý kerektigin aitty. Al, aimaq basshysy Janseiit Túimebaev atqarylýy tiis jumystardy osy jyldyń qarasha aiyna deiin tolyq aiaqtap, tizimderdi ministrliktiń málimetterimen sáikestendirý kerektigin atap ótti.
Óz kezeginde alqaly jiyndy qortyndylaǵan Eńbek jáne halyqty áleýmettik qorǵaý ministri Tamara Dúisenova Ońtústik Qazaqstan oblysynda osy baǵytta atqarylǵan jumystarǵa oń baǵasyn berdi.
Aita keteiik, elimizde jumys berýshiler men jeke kásipkerler shildeniń 1-inen bastap mindetti áleýmettik meditsinalyq saqtandyrý qoryna jarna aýdara bastaǵan. Resmi derek boiynsha, qazirge deiin qorǵa 800 million teńge túsken. Zań boiynsha, jumys berýshi ai saiyn jumyskerdiń jalaqysynan 1 paiyz mólsherinde, biraq 3 668, 9 teńgeden joǵary emes aýdarym jasaýy, jeke kásipkerler men olarǵa teńestirilgen tulǵalar - jeke qorǵaýshylar men notariýstar, kásibi mediatorlar ailyq jalaqysynan 5 paiyz nemese 2 445, 9 teńge tóleýi tiis.
