«AMANAT» partiiasynyń Ortalyq apparatynda «TALQYLAU» dialog alańynyń kezekti otyrysy ótti. Bul jolǵy saraptamalyq talqylaýdyń taqyryby: «Qasym-Jomart Toqaevty qoldaý jónindegi Halyqtyq koalitsiia».
«AMANAT» partiiasynyń Hatshysy Dáýlet Káribek atap ótkendei, Halyqtyq koalitsiianyń qurylýy jańa saiasi mádeniet qalyptasqanynyń, eldegi birliktiń kórinisi.
«Qasym-Jomart Kemeluly Toqaevtyń qoǵamdyq-saiasi kúshterdiń keń Halyqtyq koalitsiiasynan prezidenttikke kandidat retinde usynylýy, Memleket basshysynyń jáne onyń júrgizip jatqan aýqymdy áleýmettik-saiasi reformalar baǵytynyń halyq tarapynan keń qoldaýǵa ie ekendiginiń birden-bir dáleli», - dedi Daýlet Káribek.
Óz kezeginde «AMANAT» partiiasynan Májilis depýtaty Aidos Sarym ár partiianyń óz kóshbasshylary bar ekenin, biraq bul jerde memleketshildik, ulttyq turǵydaǵy másele turǵanyn atap ótti.
«Basty maqsat – elde jasalyp jatqan reformalardy sońyna deiin jetkizý, olardyń myzǵymastyǵyn qamtamasyz etý. Bul isti sońyna deiin eń úzdik, eń durys jolmen jetkizetin qazirgi Prezident. Ekinshiden, álemdegi geosaiasi jaǵdai ýshyǵyp bara jatyr. Osydai ýaqytta Qasym-Jomart Toqaevtan artyq diplomat, qairatker tulǵa joq. Sondyqtan osy jaǵdaiattardyń barlyǵyn eskere otyryp, úsh partiia da el múddesi jolynda úlken memleketshildik tanytyp, basqa da 20-dan astam qoǵamdyq uiymdarmen birigip, Toqaevtyń kandidatýrasyn usynyp otyr. Menińshe, bul zańdy qubylys», - dedi ol.
Saiasattanýshy, «Aq jol» partiiasynyń múshesi Bórihan Nurmuhamedovtyń aitýynsha, eń bastysy – sailaý ashyq bolýy kerek. Spiker kandidattardyń aldyńǵy sailaýaldy baǵdarlamalarynyń qanshalyqty oryndalǵanyn túsiný mańyzdy ekenin atap ótti.
Májiliske «AMANAT» partiiasynan sailanǵan depýtaty Juldyz Súleimenovanyń aitýynsha, Halyqtyń koalitsiia – memlekettiń basyna kún týǵan jaǵdaida birige alatynymyzdyń naqty kórinisi.
Qoldanbaly etnosaiasi zertteýler institýtynyń direktory Talǵat Qalievtiń aitýynsha, búgingi tańda Qasym-Jomart Toqaevtyń jeke reitingi kez kelgen qoǵamdyq uiymnyń reitinginen asyp túsedi.
«Ekinshi jaǵynan, Prezidenttiń barlyq saiasi partiialardan teń araqashyqtyqty ustaný – bul saiasi kúshter úshin jańa synaq. Sailaýdan keiin partiialar básekege qabiletti ortada jumys isteýge, sailaýshylarmen qarym-qatynasty retteýge májbúr bolady. Partiialar júieli ózgeristermen ainalysyp, el bolashaǵyn qalyptastyrýǵa belsendi aralasýy kerek», - dedi Talǵat Qaliev.
L.Gýmilev atyndaǵy EUÝ-diń prorektory Janna Qurmanǵalieva Qasym-Jomart Toqaevtyń sailaýǵa Halyqtyń koalitsiianyń atynan túsýi qisyndy ekenin atap ótti.
«Kez kelgen biliktiń mańyzdy fýnktsiiasy – qundylyqtardy damytý, nasihattaý ǵana emes, eń aldymen olardy ustaný. Prezidenttiń barlyq partiiadan birdei araqashyqtyqta bolý týraly sheshimi biliktiń negizgi qundylyqtardy ustanatynyn kórsetedi. Bul búkil qoǵam úshin mańyzdy. Jalpy, biz jańa saiasi júieniń paida bolǵanyna kýá bolyp otyrmyz», - dedi ol.
Dialog alańnyń moderatory «AMANAT» partiiasy Saiasi keńesiniń múshesi, belgili telejúrgizýshi Maqsat Tolyqbai boldy.
Eske sala keteiik, Astanada Qasym-Jomart Toqaevty qoldaý jónindegi Halyqtyq koalitsiianyń forýmy ótti. Forýmǵa «AMANAT», «Aq jol», Qazaqstan Halyq partiia sekildi saiasi partiialardyń jáne 20-dan astam respýblikalyq qoǵamdyq birlestikterdiń eki myńnan astam ókili qatysty.
