«AMANAT» partiiasynyń Ortalyq apparatynda «TALQYLAU» dialog alańynyń kezekti otyrysy ótti. Bul joly sarapshylar talqylaýynyń taqyryby prezidenttik sailaýdyń qorytyndysy taqyryby boldy, dep habarlaidy partiianyń baspasóz qyzmeti.
Májilis depýtaty Juldyz Súleimenovanyń aitýynsha, ótken sailaý qazaqstandyqtardyń saiasi mádenietiniń óskenin aiǵaqtaidy.
«Biyl elimizde eki iri saiasi oqiǵa: jalpyhalyqtyń referendým jáne prezident sailaýy boldy. Eger 2021 jyly parlamenttik sailaýda 7 millionnan astam adam daýys berse, referendýmǵa da, Prezidenttik sailaýǵa da 8 millionnan astam adam qatysty. Bul búgingi tańda qazaqstandyqtardyń memleketimizde bolyp jatqan barlyq saiasi protseske qatysýǵa jáne kóptegen saiasi máselede óziniń naqty pikiri bar ekenin, eldiń bolashaǵyna qatysty máselelerdi sheshýde óz daýysynyń mańyzdy ekenin túsinetinin aiǵaqtaidy», - dedi Juldyz Súleimenova.
Eýropalyq quqyq jáne adam quqyqtary institýtynyń direktory, professor Marat Báshimov sailaý ótkizý kezinde halyqaralyq standarttar tolyǵymen saqtalǵanyn atap ótti.
«Halyqtyń erkin bildirý úshin barlyq jaǵdai jasaldy, túrli qoǵamdyq birlestikter men halyqaralyq uiymdardyń baiqaýshylarynyń kedergisiz jumys isteýi qamtamasyz etildi. Tipti, elordada azamattar tirkeýsiz daýys bere alatyn ýchaskeler de jumys istedi. Aldaǵy parlamenttik sailaýǵa zańnyń ústemdigin qamtamasyz etýdiń negizin qalaǵanymyz óte mańyzdy», - dedi Marat Báshimov.
Májilistegi «AMANAT» fraktsiiasynyń múshesi Elnur Beisenbaev qazir Qasym-Jomart Toqaevtyń jaqtastary basqa kandidattarǵa daýys bergen jáne «barlyǵyna qarsy» baǵanyn tańdaǵan sailaýshylardyń pikirin eskerýi mańyzdy dep sanaidy.
«Jalpy, sol 1,5 millionǵa jýyq azamattyń pikiri mindetti túrde eskerilýi qajet. Olar aýyldyq jerlerdi damytý, áielder quqyǵyn qorǵaý, sybailas jemqorlyqqa qarsy kúres siiaqty jáne t.b. salalar boiynsha saiasattaǵy ózgeristerdi kórgisi keledi», - dep atap ótti halyq qalaýlysy.
Qoǵamdyq saiasat institýtynyń direktory Mádina Nurǵalievanyń aitýynsha, jýyrda ótken sailaý azamattardyń bilikke degen kózqarasynyń ózgergenin aiqyndap otyr.
«Adamdar bilikti qandai da bir qasietti, qol jetimsiz dúnie retinde qabyldaýdy qoia bastady. Bul eń aldymen Qasym-Jomart Toqaevtyń bastamasymen qolǵa alynǵan «Halyq únine qulaq asatyn memleket» tujyrymdamasynyń nátijesi. Osy tujyrymdama biliktiń halyqqa jaqyn bolýyn, onymen dialog qurýyn kózdeidi», - dedi Mádina Nurǵalieva.
Sonymen qatar, ol biyl Qoǵamdyq saiasat institýty alǵash ret exit poll ótkizgenin atap ótti. Onyń aiasynda 74 qala men 242 aýylda 600 sailaý ýchaskesi qamtylyp, 620-dan astam suhbat alýshy men sýpervaizer 75 myńnan astam sailaýshydan suhbat aldy.
Óz kezeginde, «AMANAT» partiiasynyń saiasi jumys departamentiniń direktory Rýslan Álishev sailaýdyń eń basty nátijesi – Qasym-Jomart Toqaevtyń baǵdarlamasy aiasynda jańa azamattyq qoǵam qalyptastyrý ekenin atap ótti.
«Úgit-nasihat jumysy ashyqtyq, naqtylyq, ádildik, adaldyq syndy qasterli qaǵidattarǵa quryldy. Úgit-nasihat naýqanyna qatysqan barsha azamat osy qaǵidatty basshylyqqa aldy. Biz ondaǵan myń kezdesý ótkizip, qoǵamnyń dialog pen ózgeriske degen úlken suranysyn baiqadyq», - dedi Rýslan Álishev.
Belgili telejúrgizýshi, «AMANAT» partiiasy Saiasi keńesiniń múshesi Maqsat Tolyqbai dialog alańynyń moderatory bolǵanyn aita keteiik.
Eske sala keteiik, «TALQYLAU» pikirtalas alańyn qurý bastamasy «AMANAT»-tyń 1 naýryzda ótken kezekten tys Sezinde partiiany transformatsiialaý baǵdarlamasynyń bir tarmaǵy retinde jariialanǵan edi. Alańda azamattardy tolǵandyratyn ózekti máselelerdi sheshetin usynystar ázirleý úshin sarapshylar, depýtattar, memlekettik organdar men ÚEU ókilderi turaqty túrde kezdesedi.
Sýretti túsirgen Áli Ǵalym
