Aýǵanstannyń júzdegen áskerii "Taliban" sodyrlarynan qashyp, Tájikstanǵa ótken. Bul týraly Tájikstannyń qaýipsizdik komiteti habarlady.
Tájikstan tarabynyń málimetinshe, 4 shildede tálipter Aýǵanstandaǵy Badahshan provintsiiasyndaǵy Hohon ýezdin esh qarsylyqsyz alǵan.
"Aýǵanstan qarýly kúshteriniń 94 sarbazy ómirlerin saqtaý úshin memlekettik shekarany Shohon bólimshesinen kesip ótip, Tájikstanǵa ótti" dedi Tájikstan qaýipsizdik komiteti.
Bul aimaq Aýǵanstannyń Badashhan provintsiiasyndaǵy Hohon ýezine qarsy ornalasqan, eki aimaqty kópir jalǵap tur.
Resmi málimet boiynsha, Aýǵanstannyń 545 soldaty Tájikstanǵa qashqan. Senbi, 4 shildede aýǵanstandyq 300-den asa sarbaz Tájikstanǵa ótken edi.
"Tájikstan shekarashylary gýmanizm men kórshige qurmet printsipine sai, Aýǵanstan áskerilerin el aimaǵyna ótkizdi" dedi shekara qyzmeti.
Aýǵanstandaǵy jaǵdai Ortalyq Aziia men kórshi elderdi alańdatyp otyr. 4 shildede Tájikstan prezidenti Emomali Rahmon Aýǵanstan prezidenti Mýhammad Ashraf Ganimen telefon arqyly sóilesip, aýǵan soldattarynyń Tájikstanǵa ótip jatqanyn talqylaǵan.
Tájik prezidenti "Aýǵanstannyń ishki isine aralaspaitynyn, biraq elde beibitshilik ornatý úshin qoldaý kórsetýge daiyn ekenin" jetkizgen.
BUU Aýǵanstan men "Talibandy" 2020 jyly kyrkúiekte AQSh-tyń qoldaýymen bastalǵan kelissózge qaita oralýdy talap etken. Biraq AQSh Aýǵanstannan áskerilerin alyp shyǵa bastaǵan tusta tálipter shabýyldy údetti. Qazir "Taliban" eldegi biraz aýmaqqa baqylaý ornatty.
