اۋعانستاننىڭ جٷزدەگەن ەسكەريٸ "تاليبان" سودىرلارىنان قاشىپ, تەجٸكستانعا ٶتكەن. بۇل تۋرالى تەجٸكستاننىڭ قاۋٸپسٸزدٸك كوميتەتٸ حابارلادى.
تەجٸكستان تارابىنىڭ مەلٸمەتٸنشە, 4 شٸلدەدە تەلٸپتەر اۋعانستانداعى باداحشان پروۆينتسيياسىنداعى حوحون ۋەزدٸن ەش قارسىلىقسىز العان.
"اۋعانستان قارۋلى كٷشتەرٸنٸڭ 94 ساربازى ٶمٸرلەرٸن ساقتاۋ ٷشٸن مەملەكەتتٸك شەكارانى شوحون بٶلٸمشەسٸنەن كەسٸپ ٶتٸپ, تەجٸكستانعا ٶتتٸ" دەدٸ تەجٸكستان قاۋٸپسٸزدٸك كوميتەتٸ.
بۇل ايماق اۋعانستاننىڭ باداشحان پروۆينتسيياسىنداعى حوحون ۋەزٸنە قارسى ورنالاسقان, ەكٸ ايماقتى كٶپٸر جالعاپ تۇر.
رەسمي مەلٸمەت بويىنشا, اۋعانستاننىڭ 545 سولداتى تەجٸكستانعا قاشقان. سەنبٸ, 4 شٸلدەدە اۋعانستاندىق 300-دەن اسا سارباز تەجٸكستانعا ٶتكەن ەدٸ.
"تەجٸكستان شەكاراشىلارى گۋمانيزم مەن كٶرشٸگە قۇرمەت پرينتسيپٸنە ساي, اۋعانستان ەسكەريلەرٸن ەل ايماعىنا ٶتكٸزدٸ" دەدٸ شەكارا قىزمەتٸ.
اۋعانستانداعى جاعداي ورتالىق ازييا مەن كٶرشٸ ەلدەردٸ الاڭداتىپ وتىر. 4 شٸلدەدە تەجٸكستان پرەزيدەنتٸ ەمومالي راحمون اۋعانستان پرەزيدەنتٸ مۋحامماد اشراف گانيمەن تەلەفون ارقىلى سٶيلەسٸپ, اۋعان سولداتتارىنىڭ تەجٸكستانعا ٶتٸپ جاتقانىن تالقىلاعان.
تەجٸك پرەزيدەنتٸ "اۋعانستاننىڭ ٸشكٸ ٸسٸنە ارالاسپايتىنىن, بٸراق ەلدە بەيبٸتشٸلٸك ورناتۋ ٷشٸن قولداۋ كٶرسەتۋگە دايىن ەكەنٸن" جەتكٸزگەن.
بۇۇ اۋعانستان مەن "تاليباندى" 2020 جىلى كىركٷيەكتە اقش-تىڭ قولداۋىمەن باستالعان كەلٸسسٶزگە قايتا ورالۋدى تالاپ ەتكەن. بٸراق اقش اۋعانستاننان ەسكەريلەرٸن الىپ شىعا باستاعان تۇستا تەلٸپتەر شابۋىلدى ٷدەتتٸ. قازٸر "تاليبان" ەلدەگٸ بٸراز اۋماققا باقىلاۋ ورناتتى.
