Aýǵanstannyń Qundyz provintsiiasynda júrgen aýǵan áskerileri. 22 maýsym 2021 jyl.
Taliban toby 22 maýsymda aýǵan-tájik shekarasyndaǵy Sherhan-Bandar aimaǵyna baqylaý ornatty. Aýǵanstannyń Qundyz qalasynan 50 shaqyrymda jatqan bul jer aýǵan-tájik shekarasyndaǵy kedendik aimaq sanalady.
Qundyz provintsiiasy keńesiniń múshesi Haliddin Hakmi AFP agenttigine tálipter 22 maýsymda "Sherhan portyn jáne shekara posttaryn" basyp alǵanyn aitqan.
Tájikstan taraby 22 maýsymda Aýǵanstan jaqtan atystyń daýsyn estigenin, tústen keiin tynyshtalǵanyn habarlady. Dýshanbe shekaradaǵy jaǵdaidyń tynysh ekenin, aýǵan soldattarynyń Tájikstan jaqqa ótpegenin málimdedi.
Taliban ókili Zabihýlla Mýdjahid "Sherhan-Bandar jáne Tájikstanmen shekara mańyndaǵy aýdandar tálipterdiń tolyq baqylaýyna ótkenin" aitty.
Qundyz provintsiiasy keńesiniń múshesi Gýlam Rabbanidiń sózinshe, atys Qundyzdan tysqary jerlerde de júrip jatyr. Atystyń saldarynan adamdar qalany tastap ketken. Aýǵanstan qorǵanys ministrligi Qundyzdaǵy keibir mańyzdy aýdandardy tálipterden qaitaryp alǵanyn málimdedi.
Taliban sodyrlary 21 maýsymda Balh provintsiiasynyń ortalyǵy Mazari-Shariftiń shetine jetkeni habarlandy. Tálipterdiń ókili Mýdjahidtiń sózinshe, sodyrlarǵa qalaǵa kirmeýge buiryq berilgen. Taliban jetekshileri bul provintsiiadan AQSh kúshteriniń tolyq shyqqanyn kútpek.
AQSh prezidenti Djo Baiden biyl mamyrda "11 qyrkúiekke deiin Aýǵanstannan amerikalyq áskeriler tolyq shyǵarylatynyn" málimdep, bul protsess bastalyp ketken. Osydan soń Taliban basqynshylyqty údetip, Aýǵanstandaǵy kóp jerlerge baqylaý ornata bastady.
Aýǵanstandaǵy BUU arnaiy ókili Debora Laions 22 maýsymda málimdeme jasap, "mamyrdan beri tálipter Aýǵanstandaǵy 370 aýdannyń 50-den astamyn basyp alǵanyn, bul basqa da elderge qaýip tóndiretinin" aitty.
