اۋعانستاننىڭ قۇندىز پروۆينتسيياسىندا جٷرگەن اۋعان ەسكەريلەرٸ. 22 ماۋسىم 2021 جىل.
تاليبان توبى 22 ماۋسىمدا اۋعان-تەجٸك شەكاراسىنداعى شەرحان-باندار ايماعىنا باقىلاۋ ورناتتى. اۋعانستاننىڭ قۇندىز قالاسىنان 50 شاقىرىمدا جاتقان بۇل جەر اۋعان-تەجٸك شەكاراسىنداعى كەدەندٸك ايماق سانالادى.
قۇندىز پروۆينتسيياسى كەڭەسٸنٸڭ مٷشەسٸ حاليددين حاكمي AFP اگەنتتٸگٸنە تەلٸپتەر 22 ماۋسىمدا "شەرحان پورتىن جەنە شەكارا پوستتارىن" باسىپ العانىن ايتقان.
تەجٸكستان تارابى 22 ماۋسىمدا اۋعانستان جاقتان اتىستىڭ داۋسىن ەستٸگەنٸن, تٷستەن كەيٸن تىنىشتالعانىن حابارلادى. دۋشانبە شەكاراداعى جاعدايدىڭ تىنىش ەكەنٸن, اۋعان سولداتتارىنىڭ تەجٸكستان جاققا ٶتپەگەنٸن مەلٸمدەدٸ.
تاليبان ٶكٸلٸ زابيحۋللا مۋدجاحيد "شەرحان-باندار جەنە تەجٸكستانمەن شەكارا ماڭىنداعى اۋداندار تەلٸپتەردٸڭ تولىق باقىلاۋىنا ٶتكەنٸن" ايتتى.
قۇندىز پروۆينتسيياسى كەڭەسٸنٸڭ مٷشەسٸ گۋلام راببانيدٸڭ سٶزٸنشە, اتىس قۇندىزدان تىسقارى جەرلەردە دە جٷرٸپ جاتىر. اتىستىڭ سالدارىنان ادامدار قالانى تاستاپ كەتكەن. اۋعانستان قورعانىس مينيسترلٸگٸ قۇندىزداعى كەيبٸر ماڭىزدى اۋدانداردى تەلٸپتەردەن قايتارىپ العانىن مەلٸمدەدٸ.
تاليبان سودىرلارى 21 ماۋسىمدا بالح پروۆينتسيياسىنىڭ ورتالىعى مازاري-شاريفتٸڭ شەتٸنە جەتكەنٸ حابارلاندى. تەلٸپتەردٸڭ ٶكٸلٸ مۋدجاحيدتٸڭ سٶزٸنشە, سودىرلارعا قالاعا كٸرمەۋگە بۇيرىق بەرٸلگەن. تاليبان جەتەكشٸلەرٸ بۇل پروۆينتسييادان اقش كٷشتەرٸنٸڭ تولىق شىققانىن كٷتپەك.
اقش پرەزيدەنتٸ دجو بايدەن بيىل مامىردا "11 قىركٷيەككە دەيٸن اۋعانستاننان امەريكالىق ەسكەريلەر تولىق شىعارىلاتىنىن" مەلٸمدەپ, بۇل پروتسەسس باستالىپ كەتكەن. وسىدان سوڭ تاليبان باسقىنشىلىقتى ٷدەتٸپ, اۋعانستانداعى كٶپ جەرلەرگە باقىلاۋ ورناتا باستادى.
اۋعانستانداعى بۇۇ ارنايى ٶكٸلٸ دەبورا لايونس 22 ماۋسىمدا مەلٸمدەمە جاساپ, "مامىردان بەرٸ تەلٸپتەر اۋعانستانداعى 370 اۋداننىڭ 50-دەن استامىن باسىپ العانىن, بۇل باسقا دا ەلدەرگە قاۋٸپ تٶندٸرەتٸنٸن" ايتتى.
