Eger aldymyzǵa júktelgen mindetterdi júzege asyra alsaq, onda shyn máninde bizde jańǵyrýǵa, progressivtik, ózine senimdi qoǵam qalyptastyrýǵa múmkindikter týatyny haq. Búgin «Egemen Qazaqstan» respýblikalyq gazetinde shyqqan Elbasy Nursultan Nazarbaevtyń «Bolashaqqa baǵdar: rýhani jańǵyrý» atty maqalasyna bailanysty saiasattanýshy Talǵat Qaliev osyndai pikir bildirdi, dep habarlaidy QazAqparat.
«Eshqandai da ásireleýsiz, kúshti maqala. Kez kelgen halyq úshin naqty ári anyq baǵyt, oǵan qol jetkizýdiń algoritmderi qajet. Abstraktili formýlalar men zor urandar emes, ár maqsatqa jetýdiń qarapaiym ári uǵynyqty joly qajet. Memleket - bul kompaniialar da, bankter de, zaýyt-fabrikalar men bilik institýttary da emes, memleket - bul ult, qoǵam jáne osynyń bárin quraityn adamdar. Jáne bir iske jumyldyratyn baǵyt bolmasa, onda olar qoǵam men ult deýge de kelmeitin baǵdarsyz tobyrǵa ainalady», - dep jazady Talǵat Qaliev óziniń áleýmettik jelidegi paraqshasynda.
Bul rette saiasattanýshy kóptegen memleketterdiń dál osyndai joldan ótkenin alǵa tartady. Máselen, onyń sózine qaraǵanda, búgingi Túrkiia úshin bir kezderi óziniń imperiialyq piǵylynan bas tartyp qana qoimai, ondai kompleksti eńserý kerek boldy. Atatúrk sol kezeńderdegi progressivtik eýropalyq qundylyqtarǵa jurtty kúshpen daǵdylandyryp, ony sanada ǵana emes, tipti kúndelikti ómirde de engizýge asa mán berdi. Máselen, eýropalyq kiim kiiýge de májbúrlegen. Japon imperatory da samýrailardyń burymyn qiyp, atam zamanǵy ǵuryptardan qutylýǵa tyrysqan. Qytai óziniń mádeni revoliýtsiiasyn bastan ótkerdi.
«Búgingi kúni osylardyń barlyǵy ózderiniń mádeni erekshelikteri men qundylyqtaryn álemge tanytqan tabysty ári zamanaýi ultqa ainalyp otyr. Túriktiń kishipeiildigi túrik áleýetiniń negizgi faktorlarynyń birine ainaldy, japonnyń qaisarlyǵy korporativtik mádeniettiń negizine endi, al qytailyqtar tózimdiliginiń arqasynda memleketin birtindep tehnologiia ortalyǵyna ainaldyryp keledi. Osynyń báriniń ózeginde halyqtyń ozyq dástúrlerine, onyń genetikalyq jáne biregei mádenietine negizdelgen, óziniń biregei jetistikter modeli, ulttyń jańǵyrǵan sanasy jatyr», - dep atap ótedi Talǵat Qaliev.
Onyń paiymynsha, Elbasynyń aǵymdaǵy Joldaýynda jariialanǵan jańǵyrtýdy sananyń jańǵyrtýynsyz júzege asyrý da múmkin emes. Sondyqtan da, salaýatty, naqty baǵdar ustanǵan qoǵam ǵana kez kelgen ekonomikalyq jáne saiasi mindetterge qol jetkize alady.
«Negizgi áńgime ultty jańǵyrtý týraly, bizdiń ózimizdiń qundylyqtar men ozyq dástúrlerimizge negizdelgen onyń basty qundylyqtary men baǵyttary týraly bolyp otyr. Bizdiń ózimizge de zamanaýi ulttyq mádeniet kerek, jetistikti paiymdaityn óz jolymyz, oǵan jetýdiń jarqyn ári tóte joly qajet. Ulttyq ideia abstraktili, sosyn onyń qarapaiym qadamdaryn uǵynyqty etip bólshektemese, ol qol jetpeitin mejege ainalýy da múmkin. Bul úshin qoǵamnyń árbir múshesi óz ornyn taba alatyndai is-qimyl jospary kerek», - dedi Talǵat Qaliev.
Is-qimyl josparyn aita kele, saiasattanýshy birinshi kezekte adami kapitalǵa, básekege qabiletti ultqa arqa súieý qajettigin eske salady.
«Bizdiń sheteldegi qandastarymyzdyń jetistiginiń ózi bizdegi ulttyq áleýettiń meilinshe bai ekendigin kórsetip otyr. Alaida, endigi kúni osyndai tulǵalyq jetistikterdi jalpyulttyq jetistikterge qarai transformatsiialaityn ýaqyt keldi, tutastai halyqtyń básekege qabilettiligin arttyrý kerek. Eger biz aldymyzǵa júktelgen mindetterdi júzege asyra alsaq, onda shyn máninde bizde jańǵyrýǵa, progressivtik, ózine senimdi qoǵam qalyptastyrýǵa múmkindikter týatyny haq», - deidi saiasattanýshy.
.jpeg)