Baýyrǵa hat
Ýa, baýyrym!
Qobdalyq,
táshkendik hám ólgeilik!
Qazaqtyń bir balasy
Tildei osy qaǵazǵa
Datyn jazdy kóldei qyp.
Altaidai zor eńselim!
Jaryq kúnde jaý tiip, jattan quqai kórse elim,
Quiysqanym kóterilse,
Sýyrylar dep qynynan
Es tutatyn semserim!
Qara ormanym!
Telegei kók teńizim!
Abadandai atamnyń,
Altyn qursaqty anamnyń
Mahabbatynan jaratylǵan egizim!
Tilin tyǵyp aýyzyna,
Dilin tyǵyp baýyryna,
Sary maidai saqtap otyrǵan negizim!
Qonysy eki jarylǵan,
Óris-oty tarylǵan
Baitaǵym!
Shaldarynyń et júregi eljirep,
Balalarynyń tulymshaǵy jelbirep,
Atajurtqa qashan, qalai qaitaryn
Kim biledi?
Soqyr, mylqaý, kereń bolsa ulyǵym,
Aryzymdy kimge baryp aitamyn?..
Qamaýdaǵy qasqyr bop,
Saǵynyshyń tasqyn bop,
Sen de júrsiń,
Qansha ret
Qara túnde Qajytaidai qashqyń kep.
Men de júrmin,
Qansha ret
Qara túnde esigimdi ashtym kep –
Jalǵyz qara kórinse emirene qushaǵyma basqym kep.
Sen ol jaqta kóziń jasqa tunyp bir,
Men bul jaqta kókiregim ulyp bir,
Qarǵa adymda qaýysha almai otyrmyz –
Shekarada qulyp tur.
Ýa, baýyrym!
Kilt tóresi - júrektegi kilt bul.
Ashylmaityn esikti topsasymen julyp kir!
Qara basyń qandy saida qalsa da –
Emshektegi balany el shetine iliktir!
Moiynymyzǵa zaman salǵan synaq bul,
Bir jaýabyn biz ǵana taba alatyn suraq bul:
Qýat qylsań – óz elińdi qýat qyl,
Sýat qylsań – óz jerińdi sýat qyl.
Jylasań da, kúlseń de
Otanyńda jylap, kúl!
Qara basyń qandy saida qalsa da –
Uldy jetkiz –
«Alla jar» dep artynan júgenińdi laqtyr!
Seniń basyń – noqtaly,
Meniń basym – oq-dári:
Uly dala oianyp, aq tańymnyń atqany,
Ul-qyzymnyń shurqyrasyp jatqany,
Astananyń jymyń qaqqan ottary,
Masairaǵan, maýjyraǵan shaqtary –
Bári-bári qýantady,
Qorqytady naq taǵy.
Shańyraǵymda qyryq rýly ulys bar,
Qazaqstan kógerse eken dep tilep,
Zar qyp júrgen joq bári.
Jurtty kórip mańaidaǵy búlingen,
Ultty kórip óz janynan túńilgen,
Sen qorqasyń aiyrylam dep tilimnen,
Aiyrylam dep dilimnen.
Ol qorqynysh qorqynysh pa,
Men qorqam:
Aiyrylam ba dep elden myna túrimmen!
Bárin qazaq kótergen,
Bárine de eti ólgen:
Qaiyr kútpei bireýden ia búginnen,
Qysylǵanda Qudaiyna ǵana júgingen.
Tek memleketimniń bolashaǵynan qorqamyn –
Árnege bir jaltaqtap,
Árkimge bir júgirgen.
Ýa, baýyrym!
Meniń janym, seniń janyń teginnen
Babalarymnyń qan men teri tógilgen,
Analarymnyń jas pen súti tógilgen
Jeruiyqty saqtaý úshin
Qaryzǵa ǵana berilgen:
Qarys súiem jerimizden aiyrylsaq,
Bizge ujmaq bola almaidy ómir de,
Bizge jaza bola almaidy ólim de!
Ýa, baýyrym!
Qobdalyq,
táshkendik hám ólgeilik!
Qazaqtyń bir balasy
Tildei osy qaǵazǵa
Datyn jazdy kóldei qyp.
Áýelden-aq taǵdyrymyz alaǵai da bulaǵai,
Sen eshkimge qaramai,
Eshteńege qaramai,
Kóshiń túze!
Buqarańdy basta, kel.
Azappen kel, tozaqpen kel,
Qash ta kel,
Urym-Qyrym as ta kel.
Kóshiń túze!
Kútpese de ulyǵy,
Kózi tórt bop tosqan el.
Kórsek – birge,
Týǵan eldiń toiynda
Bostandyqtyń shárbat dámin tataiyq.
Ólsek – birge,
Týǵan jerdiń saiynda
qushaǵymyz ajyramai jataiyq!
Astana
25.08.2014.
Talǵat Eshenuly
