Almaty oblysynyń Talǵar aýdanynda eki politsiia qyzmetkeri jemqorlyq jasady degen kúdikpen ustaldy. Olar akvapark basshysynan ózderi men týystaryna demalys ornyn tegin paidalanýdy talap etken, dep habarlaidy ult.kz.
«Vremia» gazetiniń málimetinshe, politseiler men olardyń jaqyndary Aquasia Resort akvaparkinde tegin demalyp, kásipkerge shamamen 500 myń teńge shyǵyn keltirgen. Keiin olar kirý biletterin, meiramhana qyzmetin jáne demalys úilerin aqysyz paidalanýdy talap etken.
Oqiǵa akvaparkte bir áiel jaraqat alǵannan keiin bastalǵan. Osy derek boiynsha qaýipsizdik talaptaryna sai kelmeitin qyzmet kórsetýge qatysty qylmystyq is qozǵalǵan. Alaida tamyz aiynyń sońynda is qylmys quramy bolmaǵandyqtan toqtatylǵan.
Keiin isti júrgizgen anyqtaýshy men onyń basshysy akvapark direktorynan túrli qyzmetterdi tegin kórsetýdi talap etken. Kásipker bul týraly Almaty oblysy UQK departamentiniń Sybailas jemqorlyqqa qarsy qyzmetine habarlaǵan.
Arnaiy operatsiia barysynda eki politsei ustalyp, olardyń qyzmettik kabinetterinde tintý júrgizildi. Keiin ekeýi de qyzmetten shyǵaryldy.
Qazir olarǵa qatysty qylmystyq is tergelip jatyr. Tergeý aldyn ala sóz bailasqan adamdar tobynyń qorqytyp para talap etýi baby boiynsha júrgizilýde. Bul bap boiynsha 12 jylǵa deiin bas bostandyǵynan aiyrý jazasy qarastyrylǵan.
