Foto: "Almaty" telearnasy
Máiiti Talǵar ózeninen tabylǵan 42 jastaǵy áieldi bireýler óltirip, sýǵa aǵyzyp jiberýi múmkin. Kópir basyna barǵan marqumnyń jaqyndary osyndai boljam aityp otyr, - dep habarlaidy «Ult aqparat» Almaty.tv telearnasyna silteme jasap.
Talǵar jurty keshe tabyt shyǵaryp, jaqynyn jerledi. "Tórt balasyn jetkizemin" dep júrip kóz jumǵan jalǵyzbasty áiel eki jumysty qatar alyp júrip, jańadan úi salýdy josparlaǵan. Baspana turǵyzamyn dep baqilyq bolǵan marqumnyń balasy sol túndi qorqynyshpen eske alady.
"Úige 3 aǵai keldi. Olardy birinshi ret kórdim. Olar saǵat 22:00-de ketti. Anamnyń ólimine kináli solar ma dep oilaimyn. Anammen sózge kelip qalǵanyn estidim. Ol ózine qol salýy múmkin emes. Óitkeni anam bizdi qatty jaqsy kóretin. Úi salatynyn aityp, "baqytty ómir súremiz" dep otyratyn", - dedi marqumnyń balasy.
Artynda tórt balasy bozdap qalǵan 42 jastaǵy marqumnyń máiitin jaqyndary ózen boiynan tapqan. Olar sorǵalaǵan qannyń izin kórgenin aitty. Týystary "marqum kópirden ózi qulap óldi" degenge senbeidi.
Sol túni anasynan habar ala almaǵan soń, jaqyndary ony jabylyp izdei bastaǵan. "Máiitti anyqtaýǵa kelińizder" degen qaraly habar túsken. Ol aýyl arasyn jalǵaityn qaýipti ótkelden qulap ketýi múmkin degen de boljam bar.
"Kópirden qulap ketýi múmkin be? Kóz jetkizý úshin kópirge keldim. Úige baratyn jalǵyz jol osy kópir arqyly ótedi. Biraq munda kelgende qannyń izin kórdim, onyń qan ekeni anyq kórinip tur", – dedi marqumnyń inisi Azamat Asýbaev.
Kýágerler kaza tapqan kelinshekti sońǵy ret dúkennen kórgen. Kerek-jaraǵyn satyp alyp, syrtqa shyqqan soń kamera kózinen tasa bolǵan. Al dúken men kópir arasyndaǵy qarańǵy kóshede ne jaǵdai bolǵany ázirge beimálim.
"Naqty qai ýaqytta ekenin aita almaimyn. Shai satyp aldy", – dedi dúken satýshysy Áliia Sýlpakova
Kóz jumǵan kelinshektiń aǵaiyndary ajaldyń aityp kelmeitinin túsinse de "mezgilsiz qazaǵa bázbireýlerdiń qatysy bolýy múmkin" degen pikir aitty. Olar Talǵar aýdany politsiiasy tergeýdi ádil júrgizse degen talabyn jetkizdi. Óz kezegende aýdandyq quzyrly organ qyzmetkerleri tiisti saraptamanyń taǵaiyndalǵanyn alǵa tartyp otyr.
"27 mamyrda Talǵar ózeninen bir áiel adamnyń máiiti tabylǵan. Sot-meditsinalyq saraptama nátijesi alynǵan soń, protsessýaldyq sheshim qabyldaimyz. Osy fakt boiynsha kýágerler bolǵan. Birge bolǵan adamdarmen Talǵar aýdany politsiia basqarmasyna jetkizildi. Tergeý amaldary júrgizilip jatyr", – dedi Talǵar aýdany Politsiia basqarmasynyń bastyǵy Rústem Jaryqbasov.
Aita keteiik, bir ai buryn ǵana osy qaýipti ótkelge qatysty jurt shaǵym aityp, talapqa sai kópir salsyn dep ótinish bildirgen. Jaryqsyz, jolsyz bolǵan soń talai adam sýǵa ketti dep te dabyl qaqqan. Alaida bul máseleni jergilikti bilik áli nazarǵa almaǵan. Al osy mańnan tabylǵan máiitke qatysty naqty sheshim tek meditsinalyq saraptamadan soń belgili bolmaq.
