Talǵarda jýyrda ǵana jóndeýden ótken №3 mekteptegi oqýshylardyń arasyndaǵy dúrbeleń videoǵa túsip qalǵan, - dep habarlaidy Massaget.kz portaly "Piatyi region" saityna silteme jasap.
Video Instagram áleýmettik jelisindegi kris_p_talgar paraqshasynda jariialanǵan. Kadrlardan syrtkiim iletin bólmeden shyqqan mektep oqýshylary edenge qulaǵan oqýshyny attap ótip jatqany kórinedi. Kýágerlerdiń aitýynsha, qyz esinen tanyp qalǵan.
"Mektepte jóndeý jumystary endi bitti, biraq dúrbeleń! Balany basatyn boldy ǵoi, mektep ákimshiligi qaida qarap otyr? Bul balalar ǵoi. Qyz garderobta qulap qaldy, ony taptap kete jazdady, qaraityn kúzetshi de, muǵalim de joq. Buny kim qadaǵalaidy?" - deidi ata-ana videoda.
"Bul oqiǵadan keiin mektep oqýshylary syrtkiimin synypqa aparatyn bolǵan. Óitkeni shtatta syrtkiimdi iletin qyzmetker joq", - delingen jazbada.
Keiin mektep direktory osy jaǵdaiǵa bailanysty sógis alǵan. Bul týraly Almaty oblysynyń ákimdigi habarlady.
"Oqiǵa kezinde kezekshi muǵalim shyǵaberiste turǵan 6-synyp oqýshysy qysylyp, qulap qalǵan. Synyptastary men kezekshi muǵalim oǵan turýǵa kómektesti, oqýshy esinen tanǵan joq", - delingen habarlamada.
Qyzdyń jaǵdaiy jaqsy ekeni, onyń densaýlyǵy men ómirine qaýip joq ekeni belgili boldy.
Qazaqstan Respýblikasy Eńbek kodeksiniń 64-baby 2-tarmaǵyna sáikes mektep direktory J.Qumarova tárbie jumysyndaǵy olqylyq úshin sógis túrindegi tártiptik jazaǵa tartylǵany atap ótilgen. Sondai-aq, oǵan oqýshylardyń qaýipsizdigin qamtamasyz etý jumystaryn kúsheitý, ata-analarmen aqparattyq-túsindirý jumystaryn uiymdastyrý jóninde tapsyrma berilgen.
