Búgin kinosúier qaýym «Taqiialy perishte» atap ketken Álimǵazy Raiymbekov qariia, belgili telejýrnalist Beisen Quranbek, Rio-de-Janeirodaǵy Olimpiada oiyndarynyń qola júldegeri Karina Goricheva laiyqty túrde Taldyqorǵannyń Qurmetti azamaty qataryn tolyqtyrdy. Bul týraly búgin «Jastar» saiabaǵynda ótken Qala kúni merekesinde belgili boldy. Qala turǵyndary men qonaqtaryn merekemen oblys ákimi Amandyq Batalov quttyqtady.
Búgin Almaty oblysynyń bas qalasy óziniń kezekti týǵan kúnin atap ótti.
Qalyptasqan dástúrge sai Qala kúni merekesi ortalyq saiabaqtaǵy Dańq obeliskisine gúl qoiý rásiminen bastaldy. Munan soń «Jastar» mádeni-demalys saiabaǵynda halyq serýen quryp, tilek bildirýshiler arasynda shyǵarmashylyq baiqaýlar, sporttyq jarystar, qalanyń damý jetistikteri men josparlary týraly kórmeler uiymdastyryldy.
Jinalǵandardy Qala kúnimen quttyqtaǵan oblys ákimi A. Batalov:
- Qurmetti taldyqorǵandyqtar men qala qonaqtary! Sizderdi Qala kúnimen shyn júrekten quttyqtaimyn. Bárimiz de Taldyqorǵandy jaqsy kóremiz. Óitkeni týǵan jerińdi, turyp jatqan mekenińdi, oqyǵan, jumys istegen, otbasyn qurǵan, balalaryńdy tárbielep otyrǵan jerińdi jaqsy kórmeý múmkin emes. Qala kúni – týǵan qalamyzǵa degen súiispenshiligimizdi taǵy bir márte pash etýge jasalǵan múmkindik deýge bolady, - dedi óz sózinde.
Munan ári quttyqtaýynda:
- Kúnnen kúnge qalanyń ósip, damyp, gúldenip kele jatqanyna ózderińiz kýásizder. Bizdiń qalanyń damý potentsialy óte úlken, múmkindik mol, talantty jandar da kóp. Árbir iske birlese jumylýdyń arqasynda Taldyqorǵan budan da zor jetistikterge jetip, tynyshtyqtyń, molshylyqtyń, balalardyń baqytty balalyǵynyń mekenine ainala beredi dep senemin. Óziniń kúndelikti eńbegimen, belsendi qoǵamdyq pozitsiiasymen, san qyrly talantymen qalamyzdyń damýyna, ósýine, taǵdyryna úles qosyp júrgen jandardyń bárine alǵys aitamyn. Barshańyzǵa baqyt, myqty densaýlyq, bereke-birlik tileimin! – dedi A. Batalov.
Merekede «Qoǵamdyq kóliktiń úzdik júrgizýshisi», «Úzdik ýchaskelik inspektor», «Úzdik PIK», «Úlgili úi» jáne basqa da nominatsiialar boiynsha jyl saiyn dástúrli túrde ótetin baiqaýlardyń jeńimpazdary marapattaldy. Sol siiaqty Álimǵazy Raiymbekov, Beisen Quranbek, Karina Goricheva jáne basqa da birqatar belgili azamattarǵa Taldyqorǵannyń Qurmetti azamaty ataǵy berildi.
Saltanatty shara merekelik gala-kontsertpen jalǵasyp, estrada ánshileri jinalǵan qaýymǵa merekelik kóńil kúi syilady.
Qala kúnin jastarǵa arnalǵan keshki bi keshi men otshashý qorytyndylaityn bolady.
