Taldyqorǵan qalasynyń ásem kelbeti taǵy bir jańa ǵimaratpen tolyqpaq. Jarty ǵasyrǵa jýyq ýaqyt beiimdelgen ǵimaratta jumys istep kele jatqan B.Rimova atyndaǵy drama teatrynyń ujymy úshin bul ǵimarattyń orny erekshe bolǵaly tur.
Jýyrda Almaty oblysynyń ortalyǵynda jańa drama teatrynyń qazyǵy qaǵyldy. 510 orynǵa arnalǵan zamanaýi úlgidegi 3 qabatty mádeniet oshaǵy qalanyń jańadan boi kóterip kele jatqan ońtústik-batys aýdanynda ornalaspaq. Ǵimarattyń qazyǵyn qaǵyp, kapsýlasyn salý rásimin oblys ákimi Amandyq Batalovpen birge Qazaqstannyń halyq artisteri, belgili teatr jáne kino akteri Dosqan Joljaqsynov, talantty rejisser Talǵat Temenov, teatr artisi Almahan Kenjebekova, sonymen qatar kinoakter Álimǵazy Raiymbek atqardy.
Jetisýlyq ónersúier qaýymdy aitýly oqiǵamen quttyqtaǵan oblys ákimi Amandyq Batalov Elbasy Nursultan Nazarbaevtyń ónerge degen zor qamqorlyǵynyń arqasynda osy ǵimaratty salýǵa qol jetkizilip otyrǵanyn atap ótti.
– Táýelsizdiktiń 25 jyldyǵynda Taldyqorǵannyń jańa shaǵyn aýdanynda qurylysy júrip jatqan Saltanat saraiynyń, Kórme pavilonynyń janynan osy ǵimarattarǵa sáýlettik jaǵynan úilesimi mol jańa drama teatry da salynbaqshy. Akýstikasy, sahnasy, akterler bólmesi, teatr ǵimaratynyń ózine ǵana tán basqa da erekshelikteriniń barlyǵy da eskerilip, teatr barlyq parametrlerge sai, joǵary talǵammen jasalatyn bolady.Óner qamqorlyq jasaǵanda ǵana ósedi. Mádeniet pen ónerimiz órkendep, óse bersin, jańa salynatyn teatr Jetisý halqynyń qýanyshyna qyzmet etsin, – dedi oblys ákimi A. Batalov.
Osyndai izgi tilekterin alystan kelgen óner tarlandary da bildirip, oblys halqynyń qýanyshyna ortaqtasty. Dosqan Joljaqsynov: «Dáriger adamnyń tánin emdese, óner adamnyń janyn emdeidi. Sol ónerdiń ishinde teatrdyń orny erekshe. Búgingi jańa teatrdyń qurylysyn bastaý rásimi – mádeniet úshin asa irgeli oqiǵa. Osy qýanyshtarymen Jetisý halqyn, teatr ujymyn shyn júrekten quttyqtaimyn» dedi óz sózinde.
– Qazaqstanda jalpy sany 54 teatr bolsa, sonyń 18-i jańa teatr dep esepteledi. Biraq arnaiy laiyqtap salynǵan ǵimaratta otyrǵan teatrlar neken-saiaq. Sonyń biriniń irgesi kún sanap kórkeiip, keipi adam tanymastai ózgerip, ósip kele jatqan Taldyqorǵanda qalanyp jatqanyna sizdermen birge qýanyp turmyz. Jańa teatrdan jańa talanttar ósip shyǵyp, óner ujymy halyqtyń igiligine jumys istei berýine tilektespin, – dedi Talǵat Temenov.
B.Rimova atyndaǵy teatrdyń akteri Almahan Kenjebekova osydan 41 jyl buryn qazirgi teatrǵa jas maman bolyp kelgenin, endi tájiribesi tolysqan shaqta jańa teatrda jumys isteý baqytyna ie bolatynyn qýanyshpen jetkizdi.
Á. Raiymbekov aqsaqaldyń batasynan keiin saltanatty jaǵdaida teatrdyń kapsýlasy salyndy.
Jalpy, teatr qurylysynyń quny 4 mlrd. teńgege jýyq qarjyny quraidy. Qurylys jumystaryn BI Group kompaniiasyna qarasty «Ónerkásip qurylys» JShS júrgizedi. Ǵimarattyń jalpy aýdany 10 538 sharshy metr.Qurylystyń aiaqtalý merzimi 2018 jyldyń maýsym aiyna josparlanyp otyr.
Saǵynysh Namazshamova
