Taldyqorǵanda avtomobil shinalaryn qaita óńdeý zaýytynda órt shyǵyp, úsh adam zardap shekti, dep habarlaidy Almaty oblystyq tótenshe jaǵdailar departamentiniń baspasóz qyzmeti.
Departamentke órt týraly habarlama 25 tamyzda 03.25-te kelip túsken. Málim bolǵandai, óńdelgen shinalarǵa arnalǵan 5 tekshe metrlik vakkýmdyq pirolizdeý rezervýarynda jarylys boldy. Ol ashyq alańda ornalasqan, artynan janyndaǵy eski shinalar tutanyp, 80 sharshy metr jerdi órt sharpydy.
"Órt saldarynan 1962, 1969 jáne 1977 jylǵy úsh jumysshy zardap shekti. Eki er adamnyń jaǵdaiy ortasha. 1977 jyly týǵan azamattyń jaǵdai aýyr. Úsheýi de kópsalaly aýrýhanaǵa jetkizildi", - delingen habarlamada.
Sondai-aq, dárigerler Taldyqorǵandaǵy jarylystan zardap shekkenderdiń jaǵdaiyn aitty.
«Búgin tańǵy saǵat 4:00 shamasynda 3 adam asa aýyr kúiik jaraqatymen qabyldaý bólimine tústi. Bir naýqastyń jaǵdaiy óte aýyr, 93-95 paiyz kúiik jaraqatyn alǵan. Qalǵan eki naýqastyń jaǵdaiy ortasha. Jansaqtaý bóliminde barlyq em-sharalar júrgizilip jatyr. Naýqastardyń jaǵdaiy baqylaýda», - dedi Taldyqorǵan qalalyq kópsalaly aýrýhananyń dárigeri Iliias Búirekbaev.
Órt oshaǵy tańǵy saǵat 04.27-de oqýshaýlandyrylyp, 04.49-da sóndirildi. Oqiǵa bolǵan jerge tótenshe jaǵdailar departamentiniń 9 tehnikasy men 24 qyzmetkeri bardy. Sonymen qatar politsiia qyzmetkerleri, jedel járdem men sý jáne elektr jelileri qyzmetkerleri de sol jerde boldy.
Tótenshe jaǵdailar departamentiniń boljamy boiynsha, órttiń shyǵýyna jumys aýmaǵynda tehnologiialyq protsestiń durys atqarylmaýy sebep bolǵan.
