Almaty oblysynda shet elden jáne respýblikanyń túkpir-túkpirinen jinalǵan sýretshilerdiń pleneri bastaldy. Qazaqstannyń halyq sýretshisi Aisha Ǵalymbaevanyń 100-jyldyq mereitoiyna arnalǵan kásipqoi sýretshilerdiń jumystarynan jinaqtalǵan plener «Týǵan jerim - tuǵyrym» dep atalady.
Biyl QR Sh.Ýálihanov atyndaǵy Memlekettik syilyǵynyń laýreaty, «Qurmet belgisi», «Eńbek Qyzyl tý» ordenderiniń iegeri, esimi Respýblikanyń qurmetti Altyn kitabyna jazylǵan, Qazaqstan ónerin damytýǵa qosqany úlesi úshin, «Tarlan» syilyǵyn alǵan - Aisha Ǵalymbaevanyń týǵanyna 100 jyl. «Týǵan jerim – tuǵyrym» halyqaralyq kásipqoi sýretshilerdiń pleneri osy mereitoi qarsańynda, «Rýhani jańǵyrý» baǵdarlamasy aiasynda uiymdastyrylyp otyr.
Sharanyń negizgi bóligi Tekeli qalasynda ótti. 9 qazannan bastap Jetisý jeriniń ásem tabiǵatyn beinelegen sýretshilerdiń eńbeginen 18 qazanda, taldyqorǵandaǵy Oqýshylar saraiynda kórme uiymdastyryldy. Qylqalam sheberleri ózara tájiribe almasyp, kúzdiń ásem boiaýlaryn beinelegen plenerge Qyrǵyzstan men Qytaidan jáne Astana, Almaty, Pavlodar qalalary men Batys Qazaqstan oblysynan sýretshiler kelgen. Almaty oblysynyń qylqalam sheberleri de sharadan shet qalǵan joq.
Plenerdiń jabylý saltanatyna Almaty oblysy ákiminiń orynbasary jaqsylyq Omar qatysyp, sýretshilerge jyly lebizin bildirdi. Ol óz sózinde: «Sýretshi bolý – kez-kelgenge buiyra bermeitin daryn. Ekiniń birinyń qolynan kelmeitin, óte qiyn sala. Sondyqtan da, biz ainalamyzda júrgen talanttardy baǵalap, olardyń ónerin barynsha nasihattaýǵa tiispiz. Shet eldik jáne respýblikalyq qylqalam sheberlerin Jetisý jerine shaqyrǵandaǵy maqsatymyz da osy. Eń áýeli, Jetisý ólkesiniń bai tabiǵatynda shabyttaný da keremet sezim dep bilemin!», - dedi.
Halyqaralyq plenerge QR kórkem akademiiasynyń prezidenti, QR sýretshiler odaǵynyń Almaty oblystyq filial direktory - Ermuhan Júnishan da qatysty. Akademik plenerge joǵary baǵa bere alatyndyǵyn aitty. Sondai-aq, ol: «Men kóp elderde boldym. Ónerdiń balyn ishken elderde de mundai ásem tabiǵat bola bermeidi. Bizdiń talantty sýretshilerge osyndai múmkindik berilip otyrǵanyna rizamyn. Jaǵdai jasalǵan, kórinisi kórkem jerde tamasha týyndy salmaǵanda ne isteisiń?! Bul keler urpaqqa da estelik bolyp qalar, úlken jiyn boldy. Birneshe sýretshi birigip, úlken kartina jasadyq, osy oblysqa tabystaityn bolamyz. Óitkeni, Qazaqstandyq jáne shet eldik sýretshilerdiń basy kúnde qosylmaidy»,- dep aǵynan jaryldy.
Eske salaiyq, qylqalam sheberleri osy kúnder aralyǵynda salǵan sýretterin Almaty oblysy «Kórkemóner galereiasynyń» qoryna tabystady. Endi Almaty oblysynyń turǵyndary men qonaqtary plenerge qatysýshylardyń eńbekterin atalmysh galereiadan tamashalai alady.
