Búgin Taldyqorǵanda resmi ashylýy ótken Saltanat saraiynda eki jup nekelerin qidyrdy. Jas jubailardy oblys ákimi Amandyq Batalov quttyqtady.
Saltanat saraiynyń ashylý rásimi 15 jas juptyń oryndaýyndaǵy «Mahabbat valsi» biimen bastaldy. Bi sońynan kógershin men júrek beineli sharlar ushyrý sáti de sharaǵa erekshe kórik berdi. Saraidyń ashylýyna altyn jáne laǵyl toilaryn atap ótkeli otyrǵan 2 otbasynyń ieleri negizgi qonaq retinde arnaiy qatysty.
Kópshilikti qýanyshty sátpen quttyqtaǵan oblys ákimi A. Batalov:
- Qurmetti taldyqorǵandyqtar! Búgin biz jańadan turǵyzylǵan, zamanaýi, kelisti de kelbetti Saltanat saraiyn ashyp otyrmyz. Munda tek neke qiiý rásimi ǵana oryndalyp qoimaidy, sonymen qatar túrli deńgeidegi sharalar da ótkiziletin bolady. Dese de, bul sarai eń aldymen adam ómiriniń eń mańyzdy belesi – otbasyn qurý rásiminiń erekshe qýanysh ekenin aishyqtaý úshin, umytylmastai este qaldyrý úshin qyzmet etetin bolady. Jańa Saltanat saraiynda nekege otyratyn jastar sany kóbeiip, berekesi myqty otbasylardyń qataryn tolyqtyratynyna senimdimin. Bul - Memleket basshysynyń tapsyrmalaryn basshylyqqa ala otyryp, elimizdiń demografiialyq jaǵdaiyn jaqsartý baǵytyndaǵy saiasatty júzege asyrý qadamdarynyń biri. Jas jubailarǵa jaqsylyq pen baqytty ǵumyr tileimin! – dedi A. Batalov.
Ǵimarattyń kógildir lentasy qiylǵannan keiin qatysýshylar men shara qonaqtary neke qiiý zalyna ótip, osy saraidyń tabaldyryǵyn alǵashqy bolyp attaǵan 2 juptyń neke qiiý rásimine kýá boldy. Oblys basshysy jas otaý ielerine jáne shańyraq kótergenderine 50 jáne 60 jyl bolǵan sharanyń qurmetti qonaqtaryna estelik syilyqtar tabystady.
Saltanatty sharadan keiin jinalǵandar sarai ishin aralap kórdi.
Búginge deiin uzaq jyl boiy Taldyqorǵanda neke qiiý rásimi, iaǵni AHAJ jumysy beiimdelgen ǵimaratta atqarylyp keldi. Sondyqtan arnaiy ǵimarat turǵyzýdyń qajettiligi týyndaǵan. Jańa Saltanat saraiynyń jobasyn jasaýshylar oblys ákiminiń turaqty qadaǵalaýymen saraidyń atyna zaty sai bolýy úshin usaq-túiekke deiin mán berip, árbir detaldiń úilesimde bolýyn qarastyrdy.
Saltanat saraiynyń ishi altyndalǵan túspen ásemdelgen, japsyrma áshekeilermen árlengen. Kúieý jigit pen qalyńdyqqa arnalǵan bólmeler, neke qiiýǵa arnalǵan saltanatty zal, qonaqtarǵa arnalǵan kútý zaly, 160 orynǵa laiyqtalǵan meiramhana, keń holl, jiyn ótkizetin zal bar. Nysannyń smetalyq quny 1 mlrd. 360 myń teńge. Ǵimarattyń jalpy alańy – 3531,5 sharshy metr. Ǵimarat kóp salaly bolǵandyqtan basqa da keń aýqymdy túrli sharalar ótkizýge bolady.
